Дарко Јаконов
Конкурентот BMW веќе го направи тоа, Mercedes нема да мирува. Како што Баварците нудат верзија GT од серијата 3, така и моделот со ѕвезда ќе има верзија со пет врати.
Семејството на моделот од средната класа на Mercedes ќе брои еден член повеќе во претстојната генерација. Новата класа C освен во лимузинска, комби и купе изведба ќе се нуди и како класична комбилимузина со пет врати. Магазинот Auto Bild открива дека моделот со ознака Sportcoupe, чија премиера се очекува во 2016 година, ќе го следи изгледот на купеата со четири врати CLA и CLS, но за разлика од нив, нема да поседува класичен капак на багажникот, туку голема задна врата. Целта е да се конкурира на GT изведбата на серијата 3 од Минхен.
Под хаубата ќе работат четири и шестцилиндарски мотори со дијапазон на моќност меѓу 170 и 333 КС. Цената на Sportcoupe ќе биде повисока од лимузината, односно моделот ќе биде позициониран над класичната каросериска варијанта.
