Дарко Јаконов
Компактниот модел со погон на струја i3 ќе чини исто колку лимузина од серијата 3, открива Лудвиг Вилиш, извршен директор на BMW во САД.
Точната цена на автомобилот со напредна технологија на баварскиот производител ќе биде позната при претставувањето на моделот кое што се очекува кон крајот на годината. За зголемување на автономијата, односно за овозможување на подолги релации на возење, BMW i3 може дополнително да се опреми и со двоцилиндарски бензинец со зафатнина од 0,65 литар, кој ги полни батериите на возилото. Оваа моделска изведба ќе биде поскапа од стандардната, со погон само на струја.
На поголемите светски пазари кои покажуваат свест кон животната средина ќе постојат и посебни олеснувања, односно субвенции за возилата без емисија на штетни гасови. Конкретно во САД, како еден од позначајните волуменски пазари за BMW, се очекува цената на моделот со погон на струја да се субвенционира во висина од 7.500 долари, што секако ќе го направи автомобилот уште подостапен за поширокиот круг купувачи.
Сопствениците на моделот со стандарден погон на струја ќе имаат можност да го изнајмат бензинскиот мотор за продолжување на автономијата. Вилиш не ги открива деталите околу цената, но потврдува дека оваа услуга ќе биде дел од пазарниот концепт на BMW i3.
