Јапонскиот концерн со марките Toyota, Lexus, Daihatsu и Hino продаде 9,7 милиони возила на глобално ниво во периодот од април 2012 до март годинава, што претставува зголемување од 16,3 проценти.
Само марките Toyota и Lexus забележаа светска продажба од 8,7 милиони возила, односно 17,2 проценти повеќе отколку во претходната деловна година. Со производството на новиот Toyota Avalon во Северна Америка, во верзија со стандарден и со хибриден погон, како и со зголемувањето на продукцијата во земјите во развој, Тајланд, Филипини, Индонезија и Бразил, производството надвор од Јапонија се зголеми на 5,4 милиони (+17,6%).
Во првиот квартал од годинава, Toyota продаде 192.100 возила во Европа, што е пад од околу 10 проценти. Во Северна и Латинска Америка, Океанија, на Блискиот Исток и во Африка е постигнат раст во продажбата во првиот квартал од годината. Најголем раст во овие региони е забележан на Блискиот Исток, со 25,8 проценти, односно 184.700 возила, додека во Латинска Америка се продадоа 103.400 возила, односно за 25 проценти повеќе отколку во првиот лански квартал.
