Според податоците од групацијата на увозници, во јуни се продадени само 392 патнички и лесни доставни возила Македонија. За првите шест месеци бројката изнесува 2.112 возила.
Според податоците со кои што располага групацијата на увозници, во јуни се продадени 339 патнички автомобили и 53 лесни доставни возила во Македонија. Водечките осум марки на патнички возила на македонскиот пазар се Skoda (54 возила), Volkswagen (36) и Opel со 29 возила. На преостанатите места се Ford и Toyota со по 27 возила, Hyundai (18), Peugeot (17) и Fiat (16возила). Овие осум марки, со вкупно 224 продадени патнички возила, покриваат дури две третини од нашиот автомобилски пазар. Кај доставните возила водат Citroen (13), Fiat (11) и Dacia со 6 продадени возила во јуни.
Податоците за продажбата по модели се обработени само до месец мај. Според овие статистики, продажбата во петтиот месец од 2014 година се зголемила за 11 проценти во споредба со истиот месец лани, со 357 нови регистрирани патнички и лесни доставни возила. Вкупно во првите пет месеци се продале 1.720 возила или 9% повеќе отколку лани. Првото место во мај му припаѓа на Volkswagen Golf со продажен удел од 7 проценти, пред Ford Fiesta, Opel Astra, Ford Focus и Volkswagen Polo, коишто се враќаат во водечката десетка исто како и Citroen C4 на 8-то и Ford Kuga на 10-то место.
Податоците од Царината покажуваат дека во мај се увезени 2.028 користени автомобили во Македонија, наспроти 2.407 лани. За месец јуни, бројките се 2.151 увезен користен автомобил, наспроти 2.143 лани. Вклучувајќи ги товарните моторни возила и автобусите и минубусите, во првите шест месеци од 2014 година се увезени 15.421 нови и користени возила во Македонија.
