Спортскиот теренец на Lamborghini што е најавен да стартува со продажба во 2017 година, ќе излегува од фабриката во Братислава, заедно со Audi Q7, VW Touareg и Porsche Cayenne.
Volkswagen се подготвува за големо проширување на производствените капацитети во фабриката во Словачка, по инсталирањето на најголемата метална преса во рамките на концернот. Во Братислава се произведуваат големите теренски возила што се базираат на платформата MLB, односно Audi Q7, Porsche Cayenne и Volkswagen Touareg. Од 2017 година на теренската тројка ќе се придружи и долгоочекуваниот теренец на Lamborghini, а брзо по него ќе следува и екстралуксузниот модел на Bentley, обата на платформа MLB.
Засега се откриени малку детали околу првиот сериски теренец на Lamborghini. Познато е само дека моторот ќе развива најмалку 600 КС и дека ќе се користи лесна конструкција за каросеријата, исто како кај останатите модели на марката со бикот. Италијанската марка нагласува дека Urus ќе има најниска емисија на СО2 во класата, што укажува на заклучок дека во гамата на моделот ќе се нуди и верзија со хибриден погон. Подвозјето ќе користи пневматска суспензија, со можност за автоматско или мануелно менување на висината од подлогата. Обемната примена на лесни материјали во конструкцијата на возилото ќе биде нагласена со компоненти од карбон во кокпитот и во кабината. Годишната продукција на Urus би изнесувала околу 3.000 примероци.