Dacia Sandero најпродаван модел во Европа во април

Градскиот модел на буџет-марката на Renault води со повеќе од 1.000 примероци пред Opel Corsa. Доцнат податоците од неколу пазари, меѓутоа е мошне извесно дека Dacia уште еднаш ќе се потврди како европски шампион.

Dacia Sandero е на пат да постигне уште еден триумф во месечната продажба на европскиот пазар. Се чека да пристигнат податоците од уште неколку пазари, за на Sandero да му биде потврдена уште една шампионска титула од почетокот на годината.

Dacia во април продаде 17.257 примероци од комбилимузината од градската класа. Тоа претставува раст од 42 проценти во споредба со истиот месец лани. Sandero беше лидер на европскиот пазар и во јануари.

Два модели прават неизвесност дали Sandero и во април ќе биде лидер на европскиот пазар. Се чекаат уште неколку држави во ЕУ да ги достават податоците од продажбата во минатиот месец. Во тесна битка влегуваат уште Opel Corsa и Volkswagen T-Roc. Статистиката ја води ценетата консултантска куќа Dataforce.

Opel во минатиот месец продаде 15.930 примероци од својата Corsa, за 39 проценти повеќе од април лани. Според првичните резултати, германскиот градски модел заостанува со 1.327 примероци зад Sandero. Досега се пристигнати податоци за продажбата од 90 проценти од пазарот во ЕУ, ЕФТА (Швајцарија, Норвешка итн) и Обединетото Кралство.

Volkswagen T-Roc е со 1.480 примероци зад Sandero, односно со само 153 примероци зад Corsa.

Renault Clio во април постигна 15.185 продажби, што значи дека и тој е во игра за првото место во европската продажба.

Во водечката петоркa недостига Tesla Model Y, којшто беше најпродаван модел во февруари и во март. Електричниот СУВ-модел од средната класа во април се најде на 21-то место, со продадени 9.055 примероци. Tesla постигна голем напредок во досегашниот тек од годината во споредба со лани, меѓутоа продажбата во април е неспоредливо послаба во споредба со март, кога беа продадени 46.282 примероци од Model Y.

Ова забавување на американскиот електромобил може да навести смена на водечкото место. Во првите четири месеци, Dacia Sandero има постигнато 73.785 продажби, додека Model Y засега заостанува со 73.558 продадени возила. Станува збор за два модели од сосем спротивен сегмент, како во поглед на цената и сегментот, така и во поглед на погонот. Додека Model Y во Германија чини 44.890 евра, Sandero стартува од само 11.300 евра.

Мошне е веројатно дека Dacia ќе има уште свој модел во априлскиот Топ 10. На градскиот модел Sandero може да му се продружи коммпактниот СУВ-модел Duster.

VW се потврдува со три модели во Топ 10: T-Roc, Tiguan и Golf.

Осум од десет модели во Топ 10 имаат раст во продажбата. Ford Puma изгубила значително во динамиката на продажбата во април.

Пошироко, во Топ 50, голем напредок имаат постигнато уште Skoda Octavia (+222 проценти) и Dacia Jogger (+162 проценти).

Најпродавани 50 модели на европскиот пазар во април 2023

(според податоци од Dataforce)