Долгоочекуваниот наследник на Freelander ќе го смени моделското име во Discovery Sport, слично на хиерархијата кај Range Rover. Тој ќе биде прв од новото семејство модели на иста основа.
Британскиот специјалист за терен денес потврди дека наследникот на компактниот теренец Freelander ќе го смени името во Discovery Sport. Оваа објава беше дадена денес на салонот во Њујорк, кадешто Land Rover го прикажува концептот Discovery Vision, како најава за изгледот и можностите на моделите од идното семејство Discovery.
Прв член во семејството ќе биде Land Rover Discovery Sport, по пример на воспоставената практика со врвниот Range Rover и поедноставниот Range Rover Sport. При стартот на продажбата, веднаш по влегувањето во следната година, Discovery Sport ќе биде достапен во каросериска изведба со пет седишта, а потоа ќе следува и верзијата со продолжено меѓуоскино растојание и седум седишта. Покрај овие две моделски изведби, идното семејство Discovery ќе добие уште два модела на истата основа.
Актуелниот модел Discovery ќе се замени со попрестижна верзија врз база на Discovery Sport, која што со изгледот и идеите ќе биде поблиску до концептниот автомобил од Њујорк. Просторот меѓу топ моделот и верзиите Sport ќе се пополни со робусен и масивен теренец во стил на Toyota Land Cruiser.
