Корејскиот специјалист за теренци SsangYong ќе прикаже концептот на компактен теренец на салонот во Женева. Овојпат не е интересен само дизајнот, туку и техниката. XLV е хибрид со дизел.
Под кратенката XLV, којашто произлегува од eXciting smart Lifestyle Vehicle, на салонот во Женева ќе биде прикажан концептот на специјалистот за теренски возила SsangYong. Концептот го најавува идниот кросовер во понудата на марката, кој што ќе биде позициониран под актуелниот Korando и ќе биде наменет за семејствата со активен животен стил.
Интересен новитет се крие под атрактивната каросерија на кросоверот XLV. За погонот е задолжен 1,6-литарски дизел во комбинација со електромотор и литиум јонски батерии. Иако производителот не открива други детали околу техниката, последново наведува на заклучок дека е можно батериите да се полнат и надворешно, со приклучување во струјната мрежа.
Со должина од 4,43 метри, концептот XLV е подолг од неговиот претходник XIV-1 за 29 сантиметри, што овозможува вградување на трет ред седишта и превоз на седум патници, при што средишното седиште во последната клупа лизга надолжно заради поголема приспособливост на кабината.
