Меѓу спектаклите што му успеваат на Porsche 911 GT3 спаѓа и остриот звук при старт. Porsche Design го искористи издувниот лонец од овој болид и го претвори во домашно озвучување.
Од нула до сто за 3,5 секунди. Мотор што врти слободно до 9.000 и крајна брзина од 315 километри на час. Дури и без да се знае кој стои зад овие бројки, јасно е дека станува збор за автомобил за почит. Тоа се бројките што му припаѓаат на Porsche 911 GT3. Некои го препознаваат овој модел од Цуфенхаузен и по тотално неартикулираниот и пеколен звук од издувот. Ако не може целиот автомобил, тогаш вреди да се обезбеди барем дел од него. Вклучувајќи го и звукот.
Porsche Design го нуди издувниот лонец и маската околу издувните цевки на GT3 како домашно озвучување. Издувот е оригинален, со видливи варови, и во него се крие техника што е малку поразлична од автомобилската: 2.1 virtual surround, сабвуфер, 200 вати, DTS TruSurround, блутут за пренос на звук од таблет или паметен телефон. Сето тоа „излегува“ од издувните цевки и од издувниот лонец, кои сега резонираат, произведуваат подлабок звук со поголема силина. „Делот“ е со димензии 74 х 28 х 32 cm, тежината е околу 19 килограми. И цената е соодветна: 2.900 евра. Испораката стартува дури во март, поради големата побарувачка.
