Заинтересираните купувачи на Audi добиваат можност во салонот да го конфигурираат посакуваниот автомобил преку очила за виртуелна реалност. Уште еден пионерски чекор на Audi.
Audi VR experience за првпат им нуди можност на заинтересираните купувачи, при посетата на салонот да го конфигурираат посакуваниот автомобил преку очила за виртуелна реалност. Во очилата се прикажува целата понуда на модели со четирите прстени, вклучувајќи ги сите можни комбинации од опрема. Audi е прв производител што разви сопствен софтвер за примена во виртуелната реалност.
Лука де Мео, прв човек во продажбата и маркетингот на Audi, ги претстави очилата на салонот во Детроит. „Виртуелната реалност“ на Audi се доживува во три димензии, со сите звучни ефекти, и како што тврдат креаторите, со мошне реално доживување. Купувачите можат виртуелно да седнат зад воланот на возилото што го конфигурираат или да погледнат во багажникот. Притоа, камера ги следи движењата на главата на корисникот, за системот соодветно да ја приспособи сликата. Може да се избираат бои, вид на кожа и на декоративни лајсни, или мултимедиски системи.
Технологијата ќе почне да се применува во салоните на Audi веќе во текот на оваа година, особено на пазарите што бележат голем раст. Во иднина се планира и мобилна примена, независно од продажните салони, на пример во домот на купувачот. Системот во салоните користи висококвалитетни слушалки од специјалистот Bang & Olufsen, за на пример да се доживее звукот на 14-каналното озвучување во Audi A8.
