Групацијата Фолксваген го ротира производството во германските фабрики, откако неочекувано силниот раст во побарувачката за електрични возила целосно ги исполни производствените ленти во некои фабрики за ЕВ. Во исто време, фабриките што произведуваат возила со мотори со внатрешно согорување работат под капацитетот.
Фолксваген ќе ги откаже дополнителните смени во својата матична фабрика во Волфсбург, каде што се произведуваат единствено модели со мотори со внатрешно согорување, вклучувајќи го Голф. Производителот очекува од фабриката годинава да излезат околу 580.000 возила, што е блиску до ланската бројка.
„Побарувачката за батериски електрични возила значително порасна во Германија и во останатите европски земји,“ изјави директорот за продажба на марката Фолксваген, Мартин Зандер.
Тој ја оценува ситуацијата како „пресвртница во трансформацијата на автомобилскиот пазар.“
Високите цени на бензинот и дизелот, меѓу другото, придонесоа за оваа пресвртница, кажа Зандер.
Фолксваген додава две смени во својата фабрика за ЕВ во Емден, во коишто се произведува електричниот модел од средна класа ИД.7 и за којшто владее голема побарувачка.
Во Емден се произведува и електричниот СУВ-модел ИД.4, на којшто му претстои големо моделско освежување и промена на името во ИД. Тигуан. Тоа е дел од планот на Фолксваген, електричните модели да добијат имиња што се познати на пазарот од моделите со мотори со внатрешно согорување.
Фабриката во Цвикау работи под полна пареа благодарение на зголемените нарачки за ИД.3 Нео. Производителот го смени името на својот компактен модел, при неговото моделско освежување во април. Засега не се планираат дополнителни смени.
Фолксваген првично очекуваше забавена побарувачка за електричните модели во 2026 година. Германскиот производител соопшти дека сега одговара на „сменетите услови на пазарот.“
Концернот во моментов ја преиспитува иднината за своите фабрики во Емден и Цвикау, како и за фабриката за доставни возила во Хановер и за фабриката на Ауди во Некарсулм. Фолксваген соопшти дека нема понатамошни планови со овие фабрики, откако ќе заврши производството на тековните модели во овие фабрики, во периодот од 2031 до 2034 година.
Најмногу нарачки доаѓаат за ИД Поло и за останатите малечки ЕВ
Најголемиот број нарачки сепак доаѓаат за електричните модели што се произведуваат во Шпанија, а не во Германија. Тоа се ИД Поло и Купра Равал, што излегуваат од Марторел, како и ИД Крос и Шкода Епик, од фабриката во Памплона.
Четирите модели го сочинуваат семејството достапни ЕВ на концернот Фолксваген и за нив досега пристигнаа преку 100.000 преднарачки, од коишто преку 40.000 се за ИД Поло.
Во моментов, концернот Фолксваген добива повеќе нарачки за своите батериски електрични модели, отколку за моделите со бензински или дизел мотори.
Оваа промена сепак не значи дека расте профитабилноста. Компанијата заработува помалку од своите ЕВ, отколку од возилата со мотор со внатрешно согорување.
