Најновото концептно возило на Volkswagen од серијата преработки што се води под името Enthusiast Fleet e базирано врз Tiguan SE R-Line и ја носи додавката Black RiNo.
Името на кастом-преработката на Volkswagen Tiguan R-Line доаѓа од уметничката населба во центарот на Денвер, во американската сојузна држава Колорадо. Дизајнер е Џејми Ор, а партнери во проектот беа уште голем број мали фирми што изработуваат специјални додатоци.
Интересна е замислата зад целиот проект. Tiguan е ценет и поради неговите теренски способности, но овојпат истите беа жртвувани со цел да се постигнат максимални возни својства на асфалт. Кога завршува асфалтот, презема велосипедот – Ор и самиот е љубител на велосипедизмот и за проектот избра модел од калифорниската марка Marin Bikes. Секако, велосипедот Alpine Train 2 поседува рамка од карбон. За превоз на велосипедот служи носач Thule T1.
Гумите се Continental SportContact 5P со димензија 285/35ZR20, пошироки за 50 mm од стандардните и ставени на тркала Rotiform® OZR со ширина од 10,5 инчи. Секако дека е интервенирано и во подвозјето. Вградена е висински приспособлива амортизација Solo-Werks, сериските сопирачки дискови се заменети со поголеми, од Forge Motorsport USA, заедно со 6-клипни сопирачки клешти од истиот производител.
Додадени се алу-штитници на праговите, од понудата на прибор на Volkswagen, лакирани во мат црна боја. Џејми Ор вгради и нов издувен систем од Borla, со посебно изработени издувни завршетоци што одговараат на задниот спојлер на R-Line. Не недостига и кровен спојлер.
Бројни зафати се извршени и во внатрешноста. Вниманието посебно го привлекува бирачот на менувачот од CNC-изработка, дизајниран и произвееден од Black Forest Industries од Северна Каролина.
Tiguan SE R-Line Black RiNo Concept беше претставен пред публиката на собирот Еуротрипер на Флорида.
>>> Volkswagen Tiguan во освежено издание во Порше