Дарко Јаконов
Комбето што влече корени од хипи-мобилот Volkswagen Bus e четвртиот европски модел врз платформата MEB. Нарачките за ID. Buzz стартуваат во петок, на 20-ти мај. Volkswagen цени дека комбето на струја ќе одговара и за семеен превоз, и за слободно време и бизнис, генерално како универзален автомобил со нулта емисија на штетни материи.
Без масивната субвенција, којашто на германскиот пазар на изнесува 7.500 евра, ценовникот за патничката изведба ID. Buzz Pro стартува од 64.581,30 евра. Товарната изведба ID. Buzz Cargo чини 54.430,60 евра, без субвенциите. Испораките ќе стартуваат веќе наесен.
Покрај електричен погон, комбето се одликува и со напредно вмрежување на системите за асистенција и на инфо-забавните системи, како и со функција на вчитување нов софтвер по пат на Over the Air-Update.
ID. Buzz им се придружува на ID.3, ID.4 и ID.5. Планот на Волфсбург е до 2030 година најмалку 70% од продажбата во Европа ја да сочинуваат чисто електрични модели. Големата цел е до 2050 година, целата активност на компанијата, значи не само возилата, туку и производството и добавувачите, да биде неутрална во поглед на емисијата на СО2. Патничката и товарната изведба се произведуваат во Хановер, неутрално во поглед на СО2.
Верзијата на ID. Buzz со пет седишта прво ќе се нуди во врвната изведба „Pro“, а паралелно ќе биде достапна и товарната изведба ID. Buzz Cargo. Батеријата е најголемата што се вградува во ID-фамилијата, со капацитет од 77 kWh (82 kWh бруто). Таа го снабдува со енергија електромоторот од 150 kW (204 КС) и 310 Nm на задната оска. Досегот изнесува до 421 километар (Cargo: 424 km). При користење брз полнач (170 kW), батеријата се полни од 5 до 80% за 30 минути.
