Дарко Јаконов
Toyota Yaris Cross е модел што заслужува специјални изведби. Пазарот го обожува кросоверот со вкрстени гени од штедливиот Yaris и пробивниот RAV4, па е мал ризикот дека спортска изведба со знакот на Gazoo Racing би наишла на млака реакција.
Yaris Cross GR располага со ексклузивни детали на каросеријата и во внатрешноста, а во исто време ветува и нагласен спортски карактер во возните својства, благодарение на зафатите во подвозјето. Салоните во Европа ќе стартуваат со нарачки за моделот во септември.
Главна одлика во надворешната појава се новите полирани тркала од 18 инчи, со десет краци. Спортски нагласок дава и новиот заден дифузор, како и црната решетка во маската, со ексклузивен растер, што дизајнерите го нарекуваат „Hot Stamp“. Секако дека на сите страни може да се прочита логото на Gazoo Racing. Исто како останатите изведби GR Sport, така и изведбата Yaris Cross GR SPORT се нуди со ексклузивната боја Dynamic Grey, во варијанта со црн покрив и црни каросериски додатоци.
Спортските седишта Ultrasuede се обложени со сива вештачка кожа и имаат грејачи. Црвените штепови се воочливи и на воланот и на рачката на менувачот. Логоата на Gazoo Racing се забележуваат на воланот, потпирачите за глава, копчето за старт и во инструментите. Во вратите и на арматурната табла се поставени украсни панели во темна сребрена боја.
Конструиран врз платформата GA-B, Yaris Cross GR SPORT се одликува со ниско тежиште, цврста каросерија и балансирано подвозје. Возните својства се подинамични, благодарение на неколкуте зафати во елементите од подвозјето, главно со цел на возачот да му се посредува подиректно чувство во управувањето за контактот со подлогата.
Кабината е изненадувачки просторна, има и интересна можност за подот во багажникот да биде поделен на два дела. Зафатнината на багажникот е 397 литри стандардно, односно 1.097 литри со соборена клупа.
Yaris Cross GR SPORT располага со богата сериска опременост, којашто вклучува двозонска автоматска клима, грејачи во предните седишта, како и со T-Mate, како што се нарекува најновата генерација на Toyota Safety Sense, со збогатен обем од системи за асистенција.
Спортскиот модел се испорачува само во изведбата со хибриден погон со 1,5-литарски бензинец. Долгиот óд, брзото согорување, високата компресија од 14:1, како и регулацијата на температурата и притисокот во погонската спрега, обезбедуваат мошне висок степен на термичка ефикасност од 40 проценти.
Продажбата на Yaris Cross стартуваше во 2021 година и моделот веднаш се докажа како бестселер на Toyota. Само во првото полугодие од годинава се продадени повеќе од 77.000 примероци, односно вкупно над 100.000 примероци од стартот на продажбата. Кросоверот ѝ обезбедува на Toyota пазарен удел од 7,7 проценти во B-SUV сегментот.
Пред да се појави Yaris Cross, Toyota ги имаше Urban Cruiser и Yaris Verso
