Toyota за девет месеци со близу 900.000 продажби во Европа

Европскиот огранок на Toyota Motor во првите девет месеци постигна 860.212 продажби, за шест проценти повеќе од истиот период лани. Хибридните и електричните модели учествуваат со удел од 71 проценти во продажбата. Компанијата останува доследна на својот пристап, паралелно да се туркаат сите видови погон. Огромен раст кај луксузната марка Lexus.

Toyota Motor Europe со продадени 860.212 возила од своите автомобилски марки Toyota и Lexus постигна удел од 6,6 проценти на европскиот пазар во периодот од јануари до септември. Вкупната продажба порасна за шест проценти, но уште поголем е растот кај специјалитетот на Toyota, кај хибридите, исто како и кај батериските електрични и приклучните хибридни модели – сите модели што вклучуваат електромотор во погонската спрега, заедно имаат раст од 12 проценти.

Уделот на хибридните, приклучните хибридни, батериските електрични и водородните електрични автомобили изнесува 71 проценти. Тоа значи дека две од секои три возила што излегле од салоните на Toyota и Lexus во деветте месеци, возat помал или поголем дел од својот пат чисто на струја.

Посебно поглавје во периодов ѝ припаѓа на марката Lexus, којашто со 55 проценти во плус, се вбројува меѓу луксузните марки со најголем раст на европскиот пазар годинава. Матичната Toyota е втора најпродавана марка во Европа до септември, по Volkswagen.

„Се радуваме на постојаната висока побарувачка за моделите на Toyota и Lexus ширум регионот, а посебно за нашите електрифицирани производи, коишто сега учествуваат со близу три четвртини во вкупната продажба. Тоа е сведоштво за нивната моќ како производи и за привлечноста на нашиот пристап со повеќе видови погон, што на купувачите им дава широк избор на возила со ниска емисија. Вкупните перформанси нé водат на пат да ја надминеме продажбата од 2022 година, во значителна мерка“, кажува Мет Харисон, оперативен директор на Toyota за Европа.

Yaris и Yaris Cross најпродавани во гамата, електричната bZ4X со солидни бројки

Од матичната марка за девет месеци се продадени 805.954 возила и тоа е раст од 3,5 проценти. Најпродавани се моделските семејства на Yaris и Corolla (заедно со Cross), потоа Toyota C-HR и RAV4. Овие модели учествуваат со четири петини во продажбата. Електрифицираните модели постигнаа 560.088 продажби, за девет проценти повеќе од лани. Првиот батериски електричен модел на Toyota врз наменската платформа eTNGA, спортскиот кросовер bZ4X, до септември се продаде во 14.318 примероци.

Lexus веќе има 650 нарачки за шоферскиот ван LM

Luxus-Lexus за девет месеци дојде до 54.258 продажби и исклучителен раст од 55 проценти. Електрифицираните модели со 47.097 примероци учествуваат со дури 87 проценти во продажбата на марката. Растот се должи на офанзивата во Д и Е сегментите, каде што дополнителен аргумент е достапноста на хибридни, приклучни хибридни и батериски електрични модели.

Растот кај главните носители на продажбата: NX со +69%, односно +48% за изведбата со приклучен хибрид, и RX со +44 проценти (приклучниот хибрид учесртвува со третина во продажбата). Од годинава во понуда се наоѓа и батерискиот електричен модел RZ. За престојниот период, Lexus влева надежи во новитетот LM, луксузен ван наменет за шоферски превоз – со 650 нарачки уште пред да почне испораката – како и во компактниот СУВ-модел LBX, којшто се базира врз Toyota Yaris Cross и почнува да се испорачува рано во 2024 година.

Главните обележја на продажбата на Toyota Motor Europe јануари-септември 2023:

· Вкупна продажба: 860,212 (+6% )

· Пазарен удел: 6.6% (-0.9% процентни бодови)

· Вкупно продажба електрифицирани: 607,185 (+12%)

· Удел на електрифицирани: Западна Европа: 75% – Источна Европа: 47% – Вкупно: 71%

Главните обележја на продажбата на Toyota јануари-септември 2023:

· Продажба Toyota: 805.954 (+3.5%)

· Најпродавани модели: Гамата на Corolla (161.190); Yaris Cross (146.294); Yaris (125.080); C-HR (90.437); Aygo X (64.951); RAV4 (63.989)

· Вкупно продажба електрифицирани: 560.088 (+9%)

· Најпродавани електрифицирани: Yaris Cross Hybrid (138.952); Toyota C-HR Hybrid (77.572); Yaris Hybrid (101.470); Corolla Hybrid (136.879); RAV4 Hybrid/Plug-in Hybrid (59.164)

· Удел на електрифицирани: Западна Европа: 74%, Источна Европа: 49% – Вкупно: 70%

Главните обележја на продажбата на Lexus јануари-септември 2023:

· Продажба Lexus: 54.258 (+55%)

· Најпродавани модели: NX (18.394); UX (14.056); RX (11.592)

· Вкупно продажба електрифицирани: 47.097 (+69%)

· Најпродавани електрифицирани: NX Hybrid/Plug-in Hybrid (17.703); UX Hybrid/EV (13.609); RX Hybrid (8.767)

· Удел на електрифицирани: Западна Европа: 100%, Источна Европа: 29% – Вкупно: 87%

ПРОДАЖБА НА TOYOTA И LEXUS ПО МОДЕЛИ: