Toyota отсекогаш му се посветувала максимално на саемот за тјунинг во Лас Вегас, кусо SEMA. Годинава, поради пандемијата, големиот саем постои само во дигитална форма – иако возилата се сосем реални. Специјалистите на Toyota изработија три лути верзии на Supra и една авантуристичка верзија од пикапот Tacoma.
Првиот експонат што Toyota го прикажува од дигиталниот SEMA, сосем нормално за американскиот пазар, претставува верзија од популарниот пикап Tacoma. Возилото е дело на уредниците на 4WD Toyota Owner Magazine, врвно подготвено за совладување на теренски предизвици, но и соодветно задвижувано од мотор што добива екстра „притисок“ од механички рутс-компресор Magnuson. Како основа послужи теренската верзија Tacoma TRD. Додадени се носачи за велосипеди, кајак, плус опрема за кампување и планинарење.
Уште еден уникат посебно за SEMA е верзијата на Supra со впечатливо насликана каросерија од Ornamental Conifer, прекар на британскиот уметник Николај Склејтер, кој е воедно уметнички директор во Race Service, креативна агенција во Лос Анџелес што ги поврзува луѓето кои имаат страст кон автомобилите и поп-културата. Секоја буква и бројка е насликана рачно, со емајл.
Дело на Ken Gushi Motorsports и GReddy Performance, оваа GR Supra со стартен број 21 мометно ја вози тркачот Кен Гуши во про-класата во Формула Дрифт. За доработката на возилото биле поставени три цели: Ефикасност, едноставност и ефект.
Квартетот од првата серија експонати за SEMA го заокружува GR Supra, подготвена од Papadakis Racing, со моќен линиски шестцилиндарец B58 под хаубата. Со Фредрик Асбо зад воланот, шампион во Формула Дрифт од 2015 година, оваа тркачка машина со 1.033 КС моментно води во про-класата. Серијата од девет епизоди на јутјуб, за изработката на овој автомобил, предизвика неверојатна гледаност. Видеата досега се прегледани над 14 милиони пати.