Тимот на Мајкл Џордан ќе дебитира на следната Дајтона 500, со Баба Волис зад воланот на Toyota Camry со стартен број 23. Во рамките на партнерството на американскиот огранок на Toyota, тимот ќе користи мотори подготвени од Toyota Racing, заедно со технолошка, техничка и логистичка поддршка.
Мајкл Џордан, Дени Хамлин и Баба Волис се ударните имиња во новиот тим во куп-серијата на Наскар. На триото му се придружува и Toyota, којашто ќе понуди поддршка за тимот на сите полиња.
Долгогодишниот љубител на Наскар, Мајкл Џордан, во својата кошаркарска кариера играше 13 сезони за Чикаго Булс и го предводеше тимот до шест шампионски титули во НБА. Спортската легенда стана сопственик на Шарлот Хорнетс (потоа Бобкетс) и е прв поранешен играч што поседува главнина акции за НБА-франшиза.
„Мојата прва цел за 23XI Racing е да бидам колку е можно поконкурентен во шампионатот“, изјави Џордан. „Нашето партнерство со Toyota и Joe Gibbs Racing ни обезбедува опрема, ресурси и искуство за да го постигнеме тоа.“
Дени Хамлин подолго од деценија е клучен дел од семејството на Toyota. Од неговата прва победа зад воланот на Camry во 2008 година, тој постигна 41 победи, трипати ја освои Дајтона 500 и десетпати завршуваше сезона во Топ 10. Годинава, Хамлин постигна седум победи и се надева на првата титула во куп-серијата во Наскар.
Toyota Camry со стартен број 23 ќе дебитира на Дајтона 500 и ќе им се придружи на останатите два тимови, Joe Gibbs Racing и Gaunt Brothers Racing, во големата американска трка на 14-ти февруари 2021 година.