Toyota Aygo се приспособува на новите барања на пазарот и станува кросовер. Новиот Toyota Aygo X ќе се произведува во Европа, развиен е за Европа и производителот го најавува како единствен модел во сегментот на градските мини-возила.
Големата светска грижа за животната средина доведе до тоа автомобилите што трошат најмалку, што се најдостапни и што се најевтини за одржување, да почнат да исчезнуваат од пазарот. Строгите норми за издувни гасови условуваат и скапи системи за пречистување, чијашто цена не се покажува толку многу кај скапите и престижни автомобили, но сосем е поинаку кај најмалечките и најдостапните.
Toyota останува во сегментот на мини-возилата, и не само што останува, туку и го надградува своето присуство. Ако веќе возилата од овој сегмент мора да чинат повеќе, тогаш барем и да им се понуди повеќе на луѓето. Aygo станува Aygo X, примерното и солидно градско мини станува кросовер. Јапонскиот концерн го најави тоа преку студијата Aygo X Prologue.
Toyota ја потврди премиерата на Aygo X за следниот месец. Исто како сите модели во понудата на марката, така и Aygo е развиен според TNGA-архитектурата, што нуди различни платформи за секој сегмент возила, но сите развиени со заедничката идеја – да се будат повеќе емоции при возењето.
Aygo уште претходно ја носеше ознаката X, во „истоименото“ ниво на опрема. X означува вкрстување, во случајов меѓу градско мини и теренец. Како техничка основа се користи платформата GA-B од актуелниот носител на титулата автомобил на годината во Европа, Yaris, како и од неговата СУВ-изведба Yaris Cross, што од неодамна се продава и на македонскиот пазар.
Производството на Ayto X ќе се одвива во фабриката во Колин, во Чешка.