Дарко Јаконов
Tesla повеќе не прифаќа плаќање во биткоин. Илон Маск го најави тоа со објава на твитер. Техно-милијардерот до неодамна силно се залагаше за крипто-валутата. Како причина се наведува штетното влијание на „копањето“ на биткоинот врз животната средина.
Маск е посебно загрижен околу тоа што при „копањето“ на дигиталната валута се користат фосилни горива. Повеќето копачи на крипто-валути се наоѓаат во Кина, каде што постојат голем број електрани кои користат јаглен за производство на струја. Поради тоа, Tesla повеќе не прифаќа плаќање во биткоин.
Тоа е голема пресвртница за марката, којашто претходно купи биткоини во вредност од 1,25 милијарда евра и нагласи дека крипто-валутата ќе се прифаќа како средство за плаќање при купување автомобил Tesla. Потегот е посебно неочекуван, бидејќи Tesla во првиот квартал од годината постигна голема заработка токму преку продажбата на биткоини.
Tesla не ја исклучува валутата целосно. Според Маск, крипто-валутите имаат иднина, но таа не треба да биде на сметка на животната средина. Од таа причина, Tesla не ги продава биткоините што моментно ги поседува, но ќе почне да ги користи за трансакции откако дигиталната валута ќе биде повеќе одржлива за животната средина. Компанијата во моментов се ориентира кон други крипто-валути кои „трошат помалку од 1 процент од енергијата на биткоин“.
Веста силно ја погоди вредноста на биткоинот. Курсот на најпознатата крипто-валута во светот падна и загуби повеќе од 300 милијарди долари од пазарната вредност. Акциите на Tesla исто така изгубија 4,4 проценти од вредноста.
