Дарко Јаконов
Новата ‘Busa се појави на џиновскиот дигитален билборд Cromination, како дел од рекламната кампања за новиот хипермотоцикл на Suzuki во Велика Британија.
Suzuki на спектакуларен начин ја започна кампањата за третата генерација на хипермотоциклот Hayabusa, со прикажувањето на рекламата за него на билбордот Cromination. Станува збор за еден од најголемите дигитални билборди во светот, кој се наоѓа на Кромвел Роуд, на подрачјето на Кенсингтон, во кралската четврт во Лондон.
Овој потег е воедно и дел од залагањето на британскиот огранок на Suzuki, кој во време на пандемија и во годините на предострожност што ќе следат, цени дека мотоциклите се добра замена за јавниот превоз – секако, Suzuki GB тука ги вклучува и далеку помалите и подостапни модели од својот спортски знаменосец Hayabusa.
Cromination е еден од најдолгите билборди во Европа, со вкупно 72 метри површина за прикажување. Suzuki Hayabusa ќе свети во кралската четврт во Лондон цела седмица, за секој да стане свесен дека јапонската марка има нова генерација на својата хало-машина.
Примероците од новата Hayabusa ќе почнат да пристигаат во салоните на Suzuki кон крајот на март.
Третата генерација на Hayabusa ја задржа препознатливата аеродинамична силуета по којашто стана препознатлив првиот модел со ова име во 1999 година. Новиот мотоцикл изгледа поостро и поагресивно. Нови клипови, клипници, коленасто вратило и брегасто вратило, заедно со бројни други преправки, придонесоа за значително зголемување на моќноста при ниски вртежи.
>>> Hayabusa: Сивиот сокол на Suzuki се врати со 190 КС и 299 km/h
