Во сегментот на којшто му припаѓа Опел Мока постојат повеќе од 20 модели. Без разлика дали станува збор за големоволуменска марка или за премиум марка, сите мора да имаат СУВ или кросовер во Б-сегментот. Таму владее најжестока конкуренција. Постојано доаѓаат нови модели, постоечките модели се заменуваат кога ќе им попушти силата. И, што направи Опел по четири години присуство на Опел Мока на сцената?
Марката под знакот на молњата само ја пребојадиса Мока. Колибри сина, тропски зелена и графички сива се трите нови бои, со тоа што првите две се ексклузивни за овој модел. Според Опел, тропски зелената е во согласност со „гриновејшн“, односно намерата на германската марка да ги приближи своите возила повеќе до природното.
Вистина е дека освен трите бои, што се највпечатлива промена, нови зафати има и во графиката на светосниот потпис на дневните светла, исто како и во задните светла, нови се и облогите на седиштата, има нов волан, додадена е плафониера назад, додадени се и прстени за прицврстување во багажникот и назад е сменето логото. И тоа е сé. Но, сé се сведува на тоа дека Опел ја прелакира Мока.
Тоа е исто како да имате апартман на вредна локација на море, и постојано околу вас никнуваат нови апартмани, со големи и гласни реклами, а вие спокојно само ја освежувате бојата на фасадата и на прозорците. Како може тоа? Може, затоа што ја имате најдобрата локација.
Тоа што Опел Мока го има посебно вредно е историската заднина, и секако, стилот. Нема што да се смени во овој изглед што ниту здодеал досега, ниту ќе здодее во иднина. Во историската заднина на Мока е еден од најславните и најважни модели на Опел, во времињата кога Риселсхајм беше посебно силен на автомобилската сцена, во 1970-те.
Оваа генерација на Опел Мока е продолжение на духот на Манта во нејзините две генерации. Тогаш финиот свет сакаше да се издвои со купе, денес со СУВ-купе. Многу е точно дека Манта беше модел од средна класа, со техника од Аскона, и нејзина вистинска наследничка беше Калибра, уште една легенда на Опел, додека Мока е модел од градската класа и ја дели техниката со Опел Корса, меѓутоа и ценовните категории и соодносот од класа до класа се сменија низ сиве години.
Опел Манта Б, на пример, во нејзината изведба со 1,2-литарец со 55 КС (!) од 1976 година, според архивите чинела еквивалент на денешни 6.222 евра, додека Аскона Б со истиот мотор и со две врати (!) чинела еквивалент на 5.647 евра. Тоа што исклучителната Манта беше достапна со основен мотор и со цена мошне блиску до пристојната Аскона, говори за намерата на Опел да го направи купето колку е можно подостапно до народот. Во тоа беше и успехот на Опел.
Манта е најголемата гордост на Опел во вечната конкурентска трка со Фолксваген, затоа што Волфсбург со своето Широко, а потоа и Корадо, никогаш не успеа да ги стигне имиџот и култот на Опел со неговата Манта и подоцна Калибра.
Денес тоа поглавје се пренесува мошне верно во страничната силуета на кросоверот. Додека повеќето модели во овој сегмент намерно доаѓаат со надувани каросерии и глумат моќност и цврстина, со унифициран коцкест опаш што одамна ѝ здодеа на сцената, Мока повеќе личи како купе, отколку како СУВ.
Во видеото од тестот детално се опишани и оценети сите категории низ коишто минуваат моделите во новата тест-процедура на Аутомедиа. Мока е всушност вториот модел што го минува овој тест, па дури и првиот модел што „инаугуративно“ го мина тестот беше Опел, новиот Грандленд.
- Цена на моделот на тест · Опел Мока ГС 1.2 Турбо 130 КС АТ8 · 25.530€ со металик лак и сет за поправка на дупната гума
- Цена со попуст (јуни 2025) 23.970€ (разлика 1.260€)
- Акциска цена на модел со ниво на опрема Едишн 21.990€
