Јапонскиот производител Mitsubishi ќе го каже конечниот план во четврток, на 25-ти февруари. Информацијата доаѓа од човек што директно учествува во одлучувањето.
Mitsubishi лани го објави планот за реструктурирање „Small Is Beautiful” со којшто се предвидуваше замрзнување на лансирањето на нови модели во Европа. Планот понатаму предвидува скусување на фиксните трошоци за 20% и посветување на регионот на Југоисточна Азија, каде што Mitsubishi е посебно силен.
Мерките за трансформација на компанијата ги затегнаа односите на Mitsubishi со партнерите Renault и Nissan. Ситуацијата дополнително беше отежната со починувањето на поранешниот претседател Осаму Масуко лани. Mitsubishi извесно време се соочува со стагнација на европскиот пазар, со удел од околу 1% кој не се зголемува веќе подолго од една деценија.
Алијансата на трите компании Renault, Nissan и Mitsubishi работи на план за подлабока соработка, со цел да се развиваат и произведуваат автомобили што ќе доведат до повторно зголемување на побарувачката за нивните модели. Nissan во почетокот на месецов соопшти дека ќе произведува мали достсавни возила во фабриката на Renault во Мобеж, во северна Франција.
Renault во меѓувреме се соочува со неопходност за отпуштање на илјадници вработени во Франција, во услови кога фабриките работат далеку под прагот на рентабилност. Тоа би можело да се спречи со преземање на продукцијата на моделите на Mitsubishi за европскиот пазар.
Партнерството уште закрепнува од приведувањето на поранешниот шеф Карлос Гон во 2018 година, кој ги откри големите разидувања во ставовите меѓу Renault и Nissan. Францускиот производител поседува 43% од акциите во Nissan, кој пак поседува 34% од акциите во Mitsubishi.