Дарко Јаконов
Европскиот огранок на Mitsubishi Motors денес ја објави гамата од погонски единици што ќе се нуди за новата генерација на ASX. Развиени посебно за европскиот пазар, моторите и погонските комбинации ќе се одликуваат со ниска емисија, штедлива потрошувачка на гориво и пристојни перформанси.
Влезот во гамата ќе го означи 1,0-литарски бензинец со турбонатполнење, во комбинација со 6-степен мануелен менувач. За клиентите што сакаат посилни перформанси, на располагање ќе стои 1,3-литарски мотор со директнно впрскување и турбонатполнење. Опција кај овој мотор ќе биде 7-степен менувач со двојна спојка.
Новината за целата марка е во тоа што ASX ќе биде прв модел на Mitsubishi достапен со класичен хибриден погон. Истиот ќе се состои од 1,6-литарски бензинец, два електромотори и 6-степен автоматски менувач.
Гамата ќе ја круниса изведба со приклучен хибриден погон, односно со можност за надворешно полнење на батеријата. Во основа станува збор за „надградба“ на хибридниот модел, со батерија со капацитет од 10,5 kWh. Оваа погонска изведба ќе му даде ексклузивност на ASX во сегментот на градски СУВ-модели.
Приклучниот хибриден погон веќе е вообичаена понуда во гамата на Mitsubishi. Јапонската марка уште во претходната генерација на Outlander постигна впечатлив успех, посебно на европскиот пазар, со верзијата Outlander PHEV. Во моментов се нуди и верзија на Eclipse Cross со приклучен хибриден погон, главно на големите пазари во Европа, каде што се исплатува комерцијализација на погонската изведба.
Сите погонски изведби ќе бидат достапни од стартот на продажбата во следната пролет, со можни отстапки за одредени пазари:
- 1,0-литарски MPI-T: 3-цилиндарски бензинец со турбонатполнење и впрскување во повеќе точки; 6-степен мануелен менувач. Моќност: 91 КС.
- 1,3-литарски DI-T: 4-цилиндарски бензинец со турбонатполнење и директно впрскување; 6-степен мануелен менувач или 7-степен менувач со двојна спојка (7DCT). Моќност: 140 КС, односно 158 КС (7CT).
- 1,6–литарски хибрид (HEV): 1,6-литарски бензинец со два електромотори и батерија од 1.3 kWh, во комбинација со 6-степен автоматски менувач. Моќност: Мотор 94 КС/148 Nm, електромотори 49 КС + 20 КС) . CO2 емисија: 107-113 g/km.
- 1.6-литарски приклучен хибрид (PHEV): Два електромотори од 67 и 34 КС, батерија од 10,5 kWh, во комбинација со 1,6-литарски бензинец со 92 КС/148 Nm и 6-степен автоматски менувач. Системска моќност: 160 КС. CO2 емисија: 30-31 g/km.
Моторите во основата потекнуваат од Renault Clio / Captur, односно од моделите што се базирани врз платформата CMF-B, развиени заеднички во рамките на алијансата Renault-Nissan-Mitsubishi. Новиот ASX ќе се произведува во фабриката на Renault во Ваљадолид, во Шпанија.
Mitsubishi Space Star најпродаван, Corolla втора, Suzuki со 101 возило за три месеци
