Дарко Јаконов
Најновото врвно достигнување од Ferrari сега е достапно и во верзија на Lego. Данската компанија со коцки за сите пригоди нуди Ferrari Daytona SP3 од својата врвна серија производи Lego Technic. Од кит што се состои од близу 4.000 коцки, секако дека може да се очекува одушевувачка деталност.
Главната сензација на новиот модел на Lego Technic во размер 1:8 е во целосната функционалност на 8-степениот секвенцијален менувач, со рачки на воланот. Клиповите на моторот V12 исто така се подвижни, а вреден детал претставуваат и тркалата што се лакирани во сребрена боја.
Глетката кон внатрешноста ја отвораат вратите што се подигнуваат. Разузданото коњче на воланот, не е единствениот детал што укажува на големото внимание, што е посветено за внатрешноста да се преслика колку може поверодостојно.
Четвртиот модел во серијата LEGO Technic Ultimate Car Concept е висок 14 сантиметри, долг 59 сантиметри и широк 25 сантиметри, откако ќе се состават 3.778-те делови. Гордите сопственици можат да побараат и членство во клубот, како и бројни погодности и ексклузивни подароци. Околу подготовката на моделот е посебно испечатена книга, во само 5.000 примероци. Наменски за моделот е оформен и вебсајтот www.LEGO.com/Ferrari-Daytona-SP3.
LEGO Technic Ferrari Daytona SP3 од 1-ви јуни е достапен само во специјализираните продавници на Lego ширум светот, а од 1-ви август ќе биде дистрибуиран и во редовната продажна мрежа.
Цената е по малку специфична: 399,99 евра.
