Лани Mercedes му приреди моделско освежување на „s-class“ меѓу вановите. V-Class доби нов дизајн напред, нови системи за асистенција, дизел OM 654 и 9-степен автоматик. Напредниот начин на ракување MBUX исто така е достапен за ванот, а отсега има уште една голема новина. Mercedes V-Class е достапен со пневматска суспензија Airmatic, што е единствено во сегментот.
Пневматската амортизација Airmatic автоматски го приспособува подвозјето на Mercedes V-Class според условите на патот и се грижи за врвен комфор. Растојанието од подлогата останува исто, без разлика на натовареноста и дали теренот е нерамен. Тоа е задача на двојната регулација на амортизацијата, преку два посебни вентили во амортизерите. Едниот вентил работи во притискачкиот степен на амортизерoт, другиот вентил во повратниот степен, при што секој од нив реагира зависно од фреквенцијата. Тоа придонесува за значително зголемување на стабилноста во возењето, но уште повеќе за возниот комфор, меѓу другото и поради намаленото клатење на каросеријата.
Возачот може преку Dynamic Select да избере комфорна или мануелна програма, во кои висината на возилото останува на стандардното ниво до 110 km/h. При надминување на оваа брзина, подвозјето автоматски се спушта за 10 mm, овозможувајќи подинамично возење и намален отпор на воздухот. Во спортската програма, каросеријата останува спуштена и при пониски брзини.
https://photos.app.goo.gl/5cny7BCQQK2X8toN6
Посебно е корисна програмата „Lift“, во којашто каросеријата се подигнува за 35 mm. Тоа функционира при брзина до 30 km/h. Куси излети по терен повеќе не се проблем со луксузниот ван.
Системот Airmatic, освен за V-Class е достапен и за електричната верзија EQV, како и за Vito Tourer и eVito Tourer. По желба, камп-возилата Marco Polo исто така може да вози со пневматска суспензија.
