Повисоките субвенции за електрични автомобили во Германија доведоа до нов рекорд во бројот на поднесени барања. До Сојузното министерство за економија пристигнале 32.324 барања во октомври. Рекордите се менуваат четири месеци во континуитет.
Германските власти летоска значително ги зголемија државните субвенции, кои имаа за цел да се зголеми интересот за електрични автомобили. Државата за тоа издвојува милијарди евра. Повисоката премија ќе важи до крајот на 2021 година.
Купувачите на чисто електричните автомобили добиваат субвенција во висина од 9.000 евра. Во оваа сума, германската држава учествува со 6.000 евра, додека преостанатите 3.000 евра одат на сметка на производителот на возилото. Во октомври во Германија биле регистрирани 23.158 нови автомобили со погон на струја. Тоа значи дека секое дванаесетто новорегистрирано возило во земјата, вози чисто на струја.
По 16-ти ноември, купувачите на електрични автомобили ќе можат во исто време да ги користат сојузните субвенции, но исто и субвенциите на одделните сојузни држави. Тоа ќе овозможи цената на електричните возила да биде уште подостапна.
Трипати повеќе барања отколку во октомври лани
Од јули, Министерството добило над 100.000 барања за субвенција. Тоа е неколкупати повеќе отколку во 2019 година. Само во минатиот месец се поднесени трипати повеќе барања отколку лани во октомври. За обработка на масовните барања се ангажирани 40% повеќе службеници, со цел побрзо да се одговори на побарувачката.