Карин Радстром денес ја презеде функцијата на членка на управниот одбор на Daimler Truck AG, одговорна за Mercedes-Benz Trucks. Претходното работно место на Радстром беше во Scania, кадешто таа беше членка на управниот одбор, одговорна за продажбата и маркетингот.
„Голема радост ни претставува да ја поздравиме Карин во нашиот глобален раководен тим. Таа поседува широко и богато интернационално искуство во индустријата за товарни возила и има постигнато големи успеси во изградбата на продажна организација, што е ориентирана кон клиентите, како и маркетиншки настап во истата насока“, изјави денес Мартин Даум, претседател на управниот одбор на Daimler Truck AG и член на управата на Daimler AG.
Родум Швеѓанка, Радстром ја започнала својата кариера како приправник во Scania во 2004 година, по дипломирањето како инженерка во индустриски менаџмент на Кралскиот технички факултет во Стокхолм. Од 2007 година, таа се наоѓа на најразлични раководни позиции во рамките на продажната и сервисната организација на Scania, вклучувајќи и раководење со автобускиот бизнис на компанијата и организирање на бизнисот со дигитални и вмрежени возила.
Радстром го наследува Штефан Бухнер, кој во октомври лани замина во пензија.