Дарко Јаконов
Mercedes-Benz во минатата година продаде 2,4 милиони патнички автомобили и ванови. Недостигот од полупроводници се покажа најсилно во последниот квартал, кога беа испорачани 475.968 возила или за 24,7% помалку од истиот период преклани. Шефовите во Штутгарт вешто го изменаџираа бизнисот и ја завршија годината со позитивен биланс.
Првото што го објавуваат големите автомобилски куќи при пријавувањето на продажбата за минатата година е напомената дека интересот за нивните автомобили и натаму е на високо ниво, но тесното грло во снабдувањето со полупроводници спречи тие да постигнат нова серија рекорди. Mercedes-Benz сепак постави рекорди во неколку подрачја.
Mercedes-Maybach, Mercedes-AMG и G-Class лани се продале во рекорден број примероци. Тоа докажува колку е моќен имиџот на највредната луксузна марка во автомобилската бранша во време на криза.
Рекордна продажба постигнаа и електричните и приклучните хибридни автомобили на Mercedes-Benz. Лани се испорачани вкупно 227.458 примероци или за +69,3% повеќе од преклани. Чисто електричните автомобили учествуваат со 48.936 примероци од марката Mercedes-EQ (+154,8%). Кога на тоа ќе се придружат и продажбите на smart и на Mercedes-Benz Vans, вкупната продажба на батериски електрични автомобили надминува 99.000 примероци.
Од почетокот на продажбата на EQS во август лани, за електричниот знаменосец досега се регистрирани 16.370 нарачки. Големите пазари во САД и во Кина стартуваа со продажба дури во декември, така што во претстојниот период се очекува нагло зголемување на бројот на нарачки.
Од патничките автомобили на Mercedes-Benz од јануари до декември се продадоа 2.093.476 примероци, што е за пет проценти под резултатот од преклани. Падот се должи првенствено на тесното грло во снабдувањето со полупроводници, што доведе до намалување на испораките во последното тромесечје од 2021 година за околу една четвртина.
Знаменосецот S-Class постигнал раст во продажбата од 40%, со вкупно 87.064 примероци, од коишто 35,5% се продадени во Кина. G-Class има историски рекорд со 41.174 возила. Рекорд и за Mercedes-AMG со 145.979 примероци (+16,7 %). Во случајот на Mercedes-Maybach, рекордот е постигнат со 15.730 возила (+50,7%). За тоа е најмногу заслужна Кина, со просечно 900 нарачки за Mercedes-Maybach на месечно ниво.
Throwback to the iconic power domes of the SL. Now reborn in the all-new Mercedes-AMG SL.#ThrowbackThursday #TheStarIsReborn #SLFAMILY #AMGSpirit pic.twitter.com/N7ENewjT0L
— Mercedes-AMG (@MercedesAMG) January 19, 2022
Електромобилноста напредува моќно и кај транспортерите. Mercedes-Benz Vans лани испорачал 9.000 доставни возила со чисто електричен погон, двојно повеќе отколку преклани. Расте уделот на компании што ги нарачуваат електричните eVito и eSprinter во своите возни паркови.
>>> Mercedes-Benz вложува 60 милијарди € во електричен погон
