Марката со сребрената ѕвезда во иднина ќе има три категории возила, сите луксузни: Top-End Luxury, Core Luxury и Entry Luxury. Од најскапите модели на Mercedes-Benz се очекува да постигнат раст во продажбата од 60 проценти.
На настан под името „The Economics of Desire“, Mercedes-Benz на Азурниот Брег ги објави најважните чекори на новата стратегија. Компанијата во иднина ќе се посвети уште повеќе на луксузните возила, ќе воведе нови модели, ќе ја забрза електрификацијата, а сето тоа треба да донесе и повисока профитабилност.
Понудата од модели ќе се менува и во иднина повеќе од 75% од инвестициите ќе се вложуваат во развој на модели од највисоките сегменти. До 2026 година, продажбата на тие модели треба да постигне раст од 60% во споредба со 2019 година, значи со годината пред пандемијата и сите последувателни кризи. Во силна конкуренција, Mercedes-Benz во средината на декадата ќе постигнува заработка од 14 проценти. Стратегијата ќе ја следи и големата цел, комплетната понуда од модели до 2030 година да се состои од целосно електрични возила.
Побарувачката за S-Class во минатата година беше порасната за 40 проценти, а рекордни вредности постигнаа и Mercedes-AMG и Mercedes-Maybach. Новата стратешка ориентација се заснова врз тие резултати. Соодветно на тоа ќе се изведуваат повеќе варијанти во семејството на S-Class, како и нови модели на AMG и Maybach.
Mercedes-Benz во иднина ќе се посвети на три категории модели: Top-End Luxury, Core Luxury и Entry Luxury.
Понудата од модели во подрачјето на Top-End Luxury ги опфаќа:
- сите возила од марките Mercedes-AMG и Mercedes-Maybach,
- Top-End моделите на Mercedes-EQ, EQS Limousine и EQS SUV,
- Mercedes-Benz S-Class, G-Class и GLS,
- посебни моделски серии во ограничен број примероци и ексклузивни модели преку соработки со други марки.
Студијата Vision AMG беше претставена синоќа, како најава за целосно електричната иднина на Mercedes-AMG. Спортските модели ќе користат сопствена архитектура (AMG.EA). Сите компоненти во погонот се конструирани од ново. Тоа важи и за батеријата, како и за погонската технологија. Срцето на Vision AMG е иновативен електромотор со аксијален проток, којшто е развиен од посестринската компанија YASA. Електромоторот е компактен, лесен и значително посилен од обичните.
Mercedes-Maybach в година ќе стартува со продажба на електричниот Mercedes-Maybach EQS SUV – базиран врз моделот на Mercedes-EQ што го дизајнираше Славче Таневски. Новина е Mercedes-Maybach SL. Изгледот на родстерот под знакот на AMG исто така е дело на македонскиот дизајнер.
Електричен погон ќе проработи и во G-Class. Како што објавивме неодамна, во теренецот ќе работи нова батериска технологија од Sila. Има најава и за нови модели во семејството на G-Class.
Во иднина ќе има уште повеќе лимитирани серии и возила од екслузивни соработки. Пример за тоа е специјална серија на Mercedes-Maybach S-Class: Limited Edition Maybach by Virgil Abloh. Серијата е ограничена на 150 примероци и инспирирана е од Showcar Project MAYBACH, што беше развиен во соработка со неодамна починатиот уметник и моден дизајнер.
Ексклузивни колекционерски примероци ќе се работат во новата „MYTHOS Serie“. Тоа е ултра-ексклузивна понуда, што ќе биде достапна само за најверните ентузијасти и колекционери.
Core Luxury е јадрото на марката, во којашто спаѓаат најпродаваните моделски серии, C-Class и E-Class, заедно со нивните каросериски варијанти. Електрификацијата ќе го зафати и овој сегмент. Моделите ќе користат платформа EVA2 (од EQE, EQE SUV), а подоцна ќе се користи и архитектура MB.EA. Новата E-Class што стартува в година, ќе ја прикаже насоката во којашто ќе се развива овој сегмент. Има најава за уште еден модел, врз платформата EVA2, наменет посебно за Кина.
Големо скусување има во семејството на A-Class, односно во сегментот на Entry Luxury. Место седум каросериски варијанти, во иднина ќе има три. Повеќе нагласок ќе се става на технологијата. Нов оперативен систем MB.OS (Mercedes-Benz Operating System) стартува во 2024 година, заедно со новата платформа MMA за компактни модели. Во основа, новата генерација на A-Class ќе биде уште полуксузна, а соодветно на тоа ќе биде и поскапа.
Интервју со Славче Таневски, дизајнер на Mercedes-Benz EQS SUV