Луксузниот родстер Mercedes AMG SL, што е дизајниран од Славче Таневски, ја доживеа првата ексклузивна серија. „Motorsport Collectors Edition“ е лакиран во ексклузивна комбинација од две бои, заедно со контрастни детали што се повикуваат на боите на Petronas.
Како поздрав за завршената сезона во Формула 1, Mercedes-AMG подготви специјален модел од SL 63 4MATIC+. Во изгледот се препознаваат детали од тркачкиот болид Mercedes-AMG F1 W13 E PERFORMANCE. Највпечатлив е преодот од сребрена во црна боја. По страниците е изработена ѕвездената шема, а на тоа се додадени и контрасти во боите на Petronas. Овие бои се повторуваат во предниот спојлер, на праговите и на задниот дифузор.
Појавата во боите на тркачките болиди на Mercedes-AMG ја заокружуваат кованите тркала од 21 инчи, со 10 двојни краци и рабови во заштитната боја на Petronas.
Пакетот за аеродинамика секако дека не служи само за изглед: Крилцата во предниот и задниот браник се поголеми, исто и дифузорот има добиено на формат. Бројни зафати во мазниот под придонесуваат за аеродинамичноста да се подобри, во корист и на возните својства при високи брзини и на лесното пробивање низ воздухот.
Двојниот пакет AMG Night му дава дополнителен печат на „Motorsport Collectors Edition“. Посебноста е во тоа пто бројни каросериски детали се лакирани во сјајна црна боја. Тоа се однесува на предниот сплитер, на проширувањата на праговите, на капите на ретровизорите и на додатокот во задниот дифузор. Се забележуваат и затемнети завршетоци на издувните цевки.
Вториот дел од овој пакет додава финиш во црна хром боја на маската, на ознаките на моделот и на ѕвездата назад. Внатрешноста на предните и задните светла е затемнета. Во црна боја се изведени и сопирачките клешти на композитните сопирачки. Поклопецот на резервоарот е изведен во сребро-хром финиш, секако со натпис „AMG“ што укажува дека станува збор за примерок од специјалната серија.
За спортските седишта AMG може да се избира меѓу две варијанти: Кожа напа и микрофибер во црна боја со црвени штепови или со жолти штепови. Во потпирачите за глава е втиснат грбот на AMG. Урасните детали се изведени од карбон, а скапиот материјал се вградува и во загреваниот волан.
Опременоста е соодветна на модел што ќе постои во само сто примероци: Аудио езотерија Burmester High-End 3D‑Soundsystem, амбиентално осветлување, MBUX асистент, комплетен пакет системи за асистенција и проекциски дисплеј. AMG TRACK PACE ги бележи сите податоци при возење по тркачка патека. Mercedes-AMG нагласува дека станува збор за модел со неограничена применливост во секојдневието со пакетот зафати за зголемување на практичноста на багажникот. Осветлени прагови се стандард во ваква ексклузивна машина.
Бидејќи станува збор за колекционерски примерок, Mercedes со SL 63 4Matic+ испорачува специјална церада со лого на AMG,, обложена со фланел, што пропушта воздух и одбива прашина.
Цената од 264.000 евра во Германија е релативна. Кога ќе доживее време да биде продаден, SL Collectors Edition веројатно ќе чини повеќе отколку што бил купен.
И секако, уште еднаш честитки до Славче Таневски, за дизајнот на нашиот Македонец во дизајнерскиот центар на Mercedes-Benz Cars во Зинделфинген.