за

Mercedes почнува со нарачки за првото AMG-ниво на својот најпродаван GLC

Mercedes го спојува својот најпродаван модел GLC со популарните преработки на AMG, во моделската изведба GLC 43 4Matic. Управувана задна оска е стандард.

Новиот GLC 43 4Matic донесува вредно освежување во гамата од СУВ-модели со спортски перформанси на Mercedes-AMG. Салоните можат да почнат со примање нарачки, цената за ексклузивната спортска изведба на GLC во Германија почнува од 86.870 евра, вклучувајќи 19% ДДВ.

Како што е вообичаено за AMG и како што тоа посебно ѝ се допаѓа на сцената, Mercedes-AMG GLC 43 4Matic настапува со бројни зафати во надворешноста и во внатрешноста. Со тоа се нагласува карактерот на модерен луксуз, што Mercedes-Benz го „вградува“ во своите автомобили.

Маската е различна, со препознатливите вертикални пречки, а секако дека и браникот прикажува стил на AMG, со хромирани украси и со надолжни ламели во масивните странични отвори за воздух. На тоа се надоврзуваат проширените странични прагови, задниот браник што е изведен во стил на дифузор и двете тркалезни издувни цевки.

Седиштата се обложени со квалитетна имитација на кожа Artico, во комбинација со микрофибер MICROCUT AMG, со посебна шара и со спортски стил. Со доплата може да се добие стандардна кожа или најмека телешка напа-кожа, со втиснат грб на AMG во предните потпирачи за глава. Како опција стојат на располагање и спортски седишта AMG Performance.

Погонот е задача на 2,0-литарскиот бензинец со фабрички код M 139, што се вградува во најширок опфат на модели, почнувајќи од A 45 до SL 43. Посебноста на моторот е во електричниот погон на турбокомпресорот, што придонесува за моќноста да достигне екстремни вредности за оваа категорија на зафатнина: 421 КС.

Стартер-генераторот што е поврзан со коленастото вратило преку ремен испорачува дополнителни 10 kW (14 КС) при поаѓање и при ниски вртежи.

Пакетот го заокружуваат погон на сите тркала, активно подвозје AMG RIDE CONTROL, активно управување на задната оска и менувач со кусо времетрањето на промените на степен.

Бројни опции стојат на избор во вообичаено богатата понуда од дополнителна опрема:

  • Пакет за надворешност AMG Night: 892,50 евра
  • Пакет за надворешност AMG Night II: 654,50 евра
  • Пакет за надворешност AMG Carbon I: 3.510,50 евра
  • Каросерија во боја MANUFAKTUR hightechsilber magno: 3.927 евра
  • Седишта AMG Performance Advanced: 2.558,50 евра
  • Седишта AMG Performance High-End: 5.521,60 евра
  • Пакет AMG DYNAMIC PLUS: 2.380 евра
  • AMG Real Performance Sound: 654,50 евра

Напишано од Дарко Јаконов

Објавува текстови за автомобилизам од 1994 година, дел од оригиналната постава на магазинот Ауто Плус на Томислав Биљарац, главен уредник на првото лиценцирано издание на Ауто Билд Македонија, член на жирито за избор на европски автомобил на годината Ауто 1 на групацијата магазини Ауто Билд, во 2013 година ја основа Аутомедиа.

Напишете коментар

Вашата адреса за е-пошта нема да биде објавена. Задолжителните полиња се означени со *

Електрична Opel Corsa за рели ѝ послужи како сликарско платно на берлинска уметница

Што прави Porsche 911 S/T да биде вреден 300.000 евра