Последиците од недостигот од чипови и мирувањето на неколку фабрики доведоа до пад во продажбата на автомобили на домашниот пазар на Kia и Hyundai. Во јули во Јужна Кореја се продадени 147.901 автомобил, за 8,5% помалку од истиот месец лани.
Пазарот во Јужна Кореја е во пад од 3,3% од почетокот на годинава, со вкупно продадени 1.049.762 автомобили. Единствено домашните марки се погодени од кризата со недостигот од чипови. Нивната продажба во јули била намалена за 13 проценти, со вкупно 123.512 возила, додека во исто време има драстичен скок кај увозните марки, со +23,3 проценти или вкупно 23.389 возила.
Голема пресвртница се случи на врвот на продажбата. Kia првпат е најпродавана марка во Јужна Кореја, забележувајќи раст од 3% во продажбата во јули. Уделот на Kia изнесува 32,6 проценти, додека на Hyundai му припаѓаат 31,1 проценти од пазарот. Кризата со полупроводници силно го погоди Hyundai, чијашто продажба се намали за дури 25,2 проценти. Фабриката во Асан е привремено затворена. Наспроти 34,4 проценти пазарен удел во периодот меѓу јануари и јули лани, уделот на Hyundai годинава е паднат на 32,4 проценти.
Во меѓувреме, германските премиум марки Mercedes и BMW бележат фантастичен раст, со +35,8%, односно +57,8 проценти. Останатите три домашни марки исто така се во пад: Ssangyong (-15.7%), Renault Samsung (-21.3%) и GM Korea (-30.1%). Сосем различна е ситуацијата со увозните марки: Honda (+153.5%), Jeep (+144.6%), Rolls Royce (+66.7%), Lamborghini (+41.7%), Mini (+38.3%), Lexus (+37.1%), Toyota (+32.9%), Bentley (+17.5%) и Audi (+12%), сите бележат раст.
Честа на најпродаван модел во јули и вкупно најпродаван модел годинава му припаѓа на Hyundai Porter (-4%), откако стариот лидер во продажбата во 2021 година, Hyundai Grandeur, забележа пад од 63,5 проценти и во јули заврши на 7-то место.
Второто место му припаѓа на новиот Kia Sorento (-33,2%), кој се искачи три позиции во однос на јуни. Од пет најпродавани модели во Јужна Кореја во јули, четири модели се Kia: Покрај Sorento, тоа се K8 (+121.3%), K5 (-31,7%) и Carnival (+165,8%). Додека Kia напредува, Hyundai паѓа. Моделот Avante е во слободен пад (-51,2%), исто како и Santa Fe (-28,8%) и Sonata (-28,8%).
Новата генерација на Kia Sportage забележа раст од 142,1 проценти во продажбата во јули. Пазарот ја обожува и компактната лимузина Kia K3 (+111,6%), којашто стартува во освежено моделско годиште.
Меѓу увозните модели, води Mercedes E-Class (-13,1%), пред серијата 5 на BMW (-11,3%), но веднаш на третото место следи луксузната S-Class, со сензационални +168,4%. Понатаму следат серијата 6 на BMW (+245%), X5 (+110,9%), Audi A6 (+82,8%) и серијата 3 на BMW (+61%). Од останатите модели посебно се издвојуваат Volvo S90 (+814,7%), BMW X6 (+324%), Jeep Wrangler (+304,1%), BMW X7 (+151,8%), Mercedes GLE (+127%) и Audi Q5 (+111,3%).
Тест · Kia Sorento 2.2 CRDi Premium
