Дваесет милијарди долари се вложуваат во две нови фабрики за чипови на Intel во САД. Со примена на најсовремени технологии, производството во погоните во американската сојузна држава Охајо ќе започне во 2025 година.
Откако почна кризата со чипови, американските политичари постојано вршат притисок за производството на полупроводници повторно да биде присутно масовно во земјата. Со децении наназад, светската продукција на чипови е сосредострочена главно во Азија.
Како што најавува Intel, во Охајо ќе се произведува и за потребите на безбедноста и на инфраструктурата. Концернот најавува дека инвестицијата вредна над 20 милијарди долари е само почетокот.
Intel моментно бара локација за фабриката што е планирана да се гради во Европа. Концернот направи стратешка пресвртница. Место да произведува само сопствени чипови, Intel во иднина ќе се посвети повеќе на изработката на чипови по налог, за потребите на други компании. За фабриките во Охајо е предвиден таков начин на поставеност на работењето.
Hello, Silicon Heartland! With a $20b investment just announced by our CEO @PGelsinger, Licking County in Ohio is set to become the new epicenter of leading-edge tech! #IntelOhio pic.twitter.com/hkMhneKMJj
— Intel (@intel) January 21, 2022
Глобалниот недостиг од чипови поттикна бран од инвестиции вредни милијарди, за проширување на капацитетите. Но, како што ќе биде случај и со Intel, додека новите фабрики почнат со производство, ќе поминат неколку години
Кризата е предизвикана од зголемената потреба од лаптопи, за работење и учење од дома, поради светската здравствена криза. Некои познавачи на браншата излегоа со оцени дека тесното грло во снабдувањето се должи на забрзаната дигитализација во сите подрачја.
Некогашниот неприкосновен примус во индустријата на полупроводници, Intel, во изминатите години се соочи со потешкотии во производството, кои го одложија воведувањето нова генерација чипови. Помалиот ривал AMD во меѓувреме го зголеми својот пазарен удел.
Apple ги замени процесорите од Intel во своите персонални компјутери со чипови од сопствен развој. Тие ја користат истата архитектура како чиповите во iPhone. Покрај тоа, ривалот Qualcomm сака да го потисне Intel од Windows-PC.
>>> Како авто-производителите постигнаа рекордни заработки во чип-кризата