Дарко Јаконов
Тоа би можело да им биде поучно и на овдешните државници. Увозот на фосилни горива им претставува голем финансиски товар на африканските држави и само ги празни девизните залихи, што и без тоа се скромни.
Африка е за електромобилност. Најголемата увозна стока во Зимбабве се фосилните горива и деривати, коишто учествуваат со 19,2% во вкупниот увоз во земјата. Слична е ситуацијата во Кенија, којашто лани го зголемила увозот на нафтени продукти за 12 проценти, со вкупно 6,4 милиони тони горива, вредни 3 милијарди долари. Етиопија годишно троши околу 4 милијарди долари на увоз на нафтени деривати.
Поттикнувањето на продажбата на електрични возила и замената на фосилните горива што ги празнат девизните залихи, со чиста електрична енергија од сопствено производство, во подолг рок ќе доведе до напредување на економијата во африканските држави. Етиопија произведува 100% од електричната енергија од хидроцентрали и ветер. Од вкупно 15.075 GWh произведени во 2020 година, 14.404 GWh потекнувале од хидроцентрали, додека ветриштата произвеле 609 GWh.
Етиопија исто така го зголемува капацитетот на хидроцентралите, вклучувајќи ја GERD (Grand Ethiopian Renaissance Dam) со капацитет од 5.150 MW. Тоа ќе додаде нови 15.500 GWh чиста енергија во билансот на африканската држава.
Земјата веќе привлекува инвеститори во електромобилноста. Marathon Motor Engineering, заедничка инвестиција на Hyundai Motor Company и на олимпискиот шампион Хаиле Гербреселасие, започна со монтажа на електричниот Hyundai Ioniq во Етиопија уште во 2020 година. Во меѓувреме се отвораат фирми за продажба на електрични возила и за складирање енергија.
За да ги ослободи електричните возила од сите давачки, Министерството за финансии на Етиопија неодамна воведе ослободување на сите електрични возила од ДДВ, акциза и данок на возило. Компаниите што ќе вршат монтажа на возила од полуготови модули (CDK), исто така се ослободуваат од царина.
Министерството за транспорт и логистика има 10-годишен план за да овозможи увоз на најмалку 4.800 електирчни автобуси и 148.000 електрични автомобили.
