Дарко Јаконов
Автомобилот со најславната моделска ознака во историјата на францускиот автомобилизам, отсега ќе носи печат Made in Germany. Според Французите, DS 4 е спој меѓу напредна технологија и господскиот savoir-faire на парискиот луксуз.
Новиот DS 4 е „Designed in Paris & Made in Germany“. Моделот од премиум сегментот во компакт класата почна да се произведува во фабриката во Риселсхајм и наскоро ќе пристигне кај првите клиенти. DS 4 користи усовршена изведба од електрифицираната платформа EMP2 и веднаш е достапен во изведба со приклучен хибриден погон.
Речиси една година траеше подготовката за вклучување на новиот модел на француската луксузна марка во Риселсхајм. Благодарение на посебната организација, како и на приспособливоста на платформата EMP2, на иста лента се произведуваат примероци од DS 4 со бензински, со дизел и со приклучен хибриден погон.
Четвртиот самостоен модел ја заокружува понудата на париската марка DS Automobiles по DS 7 Crossback, DS 3 Crossback и DS 9. На купувачите им се нудат три изведби, DS 4, DS 4 Cross и DS 4 Performance Line. Новиот модел е наменет и за љубителите на класичните компактни автомобили, но и за фановите на атрактивните СУВ-купеа. Покрај стил, DS 4 нуди технички иновации, висок комфор и моќни мотори со ниска потрошувачка.
Платформата EMP2 ја користат и новите генерации на Peugeot 308 и Opel Astra
Во развојот на DS 4 е посветено големо внимание на аеродинамичноста, исто како и во лесната конструкција. Со користење делови од композитни материјали, со структурни каросериски елементи што се пресувани топло и смалување на димензиите на компонентите, како што е клима-уредот, не само што осетно е намалена тежината, туку и постигнато е оптимално искористување на просторот.
Посебно голем интерес се очекува за изведбата со приклучен хибриден погон, со комбинација од 1,6-литарски турбо-бензинец со 180 КС, со електромотот со 110 КС и 8-степен автоматски менувач. Системската моќност изнесува 225 КС, исто колку во Peugeot 3008 Hybrid и во Opel Astra Hybrid. Батеријата од 12,4 kW овозможува со полна батерија да се извозат до 55 километри, пред да се активира хибридниот погон.
Во 2024 година следи и чисто електрична изведба.
