Дарко Јаконов
Романската марка Dacia, дел од групацијата Renault, ќе вградува мотори со внатрешно согорување во своите автомобили колку може подолго, изјави извршниот директор Дени Ле Вот.
Додека марката Renault планира целосно да се префрли на електричен погон до 2030 година, Dacia ќе ја искористи можноста да продолжи со мотори со внатрешно согорување до 2035 година. Тогаш законите на ЕУ ќе бараат сите нови автомобили да имаат нулта емисија на СО2. На тој начин практично се забранува продажба на мотори што користат фосилни горива.
„Renault ќе притиска да прерасне во шампион во електричните мотори; тоа носи ризици“, изјави Ле Вот за време на презентацијата во минатата недела, во Ле Бурже, во близина на Париз. „Затоа постои Dacia. Зависно од брзината со којашто пазарот се префрлува на електрични мотори и од апетитот на клиентите, тука е Dacia. Двете марки можат да опстојуваат заедно“, додаде менаџерот на Dacia.
Dacia има само еден модел со целосно електричен погон. Тоа е мини-автомобилот Spring, којшто се произведува во Кина и учествува со 12% во нарачките за возила од Dacia. Директорите посочуваат дека марката ќе се електрифицира како што технологијата ќе станува подостапна, за да не се изгуби базата на клиенти на Dacia, коишто бараат подостапни автомобили со голема противвредност.
Малите бензински мотори, што во повеќе модели се нудат и во изведба приспособена за погон на автогас, остануваат основа на понудата на Dacia и учествуваат со една третина во продажбата на марката. Во меѓувреме, Dacia се подготвува да го понуди и својот прв модел со хибриден погон. Тоа ќе биде изведба во гамата на компактниот кросовер Jogger, што ќе стартува во 2023 година. Jogger ќе го користи хибридниот систем E-Tech на Renault, што Французите го воведоа во 2020 година.
#Dacia unveils Manifesto: a new concept car designed for adventurers who want to explore new roads. More than a concept car, it's the brand's vision. 🏔️ #DaciaManifesto
Discover more about Dacia's vision: https://t.co/mlRXMwAvfN pic.twitter.com/uhf5ZMHLc0— Renault Group (@renaultgroup) September 16, 2022
Моделите на Dacia се продаваат и надвор од Европа, во земји во развој, коишто во повеќето случаи уште немаат поставено цели за електрификација на возниот парк. На дел од извозните пазари, место знакот на Dacia стои знак на матичниот Renault.
Renault пред една деценија беше пионер во електричниот погон, во алијанса со партнерот Nissan, но во меѓувреме ја изгуби трката, главно од моделите од групацијата Volkswagen.
Како дел од програмата за закрепнување на компанијата, Renault во следниот месец ќе го објави планот да ги издвои моделите со електричен погон, како посебен бизнис во рамките на групацијата, одвоен од моделите со мотори со внатрешно согорување.
Кинески Geely сака да го купи не-електричниот бизнис на Renault
