Дарко Јаконов
Едноставно, луто и апсолутно прекрасно. Така во тимот на формула 1 на Alfa Romeo гледаат на новиот болид за сезоната 2023. Најбрзата Alfa Romeo беше претставена во исто време во Цирих и во седиштето на тимот во Хинвил, Швајцарија.
Валтери Ботас и Џоу Гуанју ќе ги бранат црвената и црната боја на својот нов болид C43 во претстојната сезона. Новата тркачка машина е претставена преку одушевувачко видео, во коешто C43 се создава од природни суровини и од распрснати делови. Тоа укажува дека тимот претставува унија на индивидуалци што се здружени и секој има важна улога за да обебеди тимот на Alfa Romeo во формула 1 да биде успешен. Шемата е дизајнирана од студиото Centro Stile на Alfa Romeo.
Конструирањето го раководеше тимот на Жан Моншо, моторот е Ferrari. Раководејќи се според промените во правилникот од ФИА за новата сезона, новиот болид доби комплетно нови делови и генерално претставува голем напредок во споредба со ланскиот C42.
Веќе неделава претстои првото возење на тркачка патека, во Барцелона, а кон крајот на месецот ќе бидат извршени и тестирања во Бахреин.
Алесандро Алуни Брави, директор на Sauber Group и претставник на тимот, објаснува дека „нашиот нов автомобил е резултат од повеќемесечна работа, но ова денес е само почетокот на патувањето.“
Quadrifoglio, четирилисната детелина што отсекогаш ги следи тркачките автомобили на Alfa Romeo, се наоѓа од двете страни на болидот, а логото на италијанската марка се забележува уште појасно. Тоа се двата симболи на италијанскиот натпреварувачки дух уште од 1910 година.
Валтери Ботас најдобро знае што го чека сезонава: „Постигнавме прилично солиден прогрес и сега има само еден правец што треба да се следи – нагоре, повисоко и подобро.“ Во истиот тон продолжува колегата Џоу Гуанју, кој вели дека „очекувањата за годинава дефинитивно се повисоки, и сето искуство од мојата почетничка сезона ќе го пренесам во 2023. Со нетрпение чекам да видам што ќе се случи и подготвен сум за напад“.
