Тесла Модел Ипсилон ја предводи септемвриската продажба, Рено и Фолксваген во тесна битка за второто место

Тесла Модел Ипсилон ќе биде најпродаваниот автомобил во Европа во септември. СУВ-моделот од средната класа вторпат годинава ќе се најде на првото место во продажбата, откако Дачиа Сандеро во претходните три месеци постојано избиваше на врвот.

Тоа е голема промена за Тесла, чијашто продажба обично е послаба во првиот месец од секој квартал. СУВ-моделот од средна класа е на пат да го престигне најблискиот соперник со близу 8.000 продадени возила, иако продажбата му опадна во споредба со минатата година.

Со продадени 28.680 примероци, модел Ипсилон во минатиот месец изгуби 3,6 проденти од продажбата во истиот месец лани, покажуваат првичните бројки од истражувачката куќа Датафорс.

Неизвесна е трката за второто место, според првичните податоци за 99 проценти од продажбата во Европската Унија, ЕФТА и Обединетото Кралство.

Фолксваген Тигуан води пред Рено Клио со 20.763 возила, наспроти 20.306 возила. Тој сооднос може да се промени, откако ќе пристигнат продажбите и од последните два пазари што уште немаат доставено податоци – Унгарија и Словачка.

Продажбата на Тигуан во минатиот месец порасна за 28 проценти, додека Клио напредуваше за 0,8 проценти.

Сандеро ќе заврши на 4-то место, со 19.346 продадени примероци, што е за 0,5 проценти послабо во споредба со лани. Малечката комбилимузина на романската марка на Рено шестпати се искачуваше на првото место во продажбата во Европа во првите девет месеци од годината.

Киа Спортаж, со продадени 16.284 возила, исто така води тесна трка со Пежо 208, со продадени 16.103 примероци, според првичните податоци.

Трката е неизвесна и за седмото место, каде што засега води Фолксваген Голф со продадени 15.722 возила, пред Тојота Јарис Крос со 15.498 возила.

Уште потесна трка се води меѓу Тојота Јарис и Опел Корса, за 12-то место, со предност на Тојота од само 67 возила пред својот соперник од истата класа.

Осум од 15-те најпродавани модели во минатиот месец постигнале зголемена продажба во споредба со септември 2023.

Водачи по девет месеци

По девет месеци, Сандеро води со 203.474 продадени возила, пред Голф (165.370) и Клио (162.021 возила).

Клио го престигна Т-Рок, откако во јули му препушти водство на германскиот СУВ. Т-Рок сега е на 4-то место со продадени 156.803 возила.

Водечката петорка ја заокружува Тесла Модел Ипсилон, со продадени 155.428 возила. Електричниот СУВ-модел од средната класа ги престигна Тојота Јарис Крос (146.511) и Пежо 208 (146.448), потиснувајќи ги градските модели на 6-то, односно на 7-то место.

Модел Ипсилон во август беше на 8-то место, односно на 9-то место во вкупната продажба по девет месеци. Доколку се задржи овој раст во продажбата, можно е Модел Ипсилон да ја одбрани титулата на најпродаван модел на европскиот пазар што ја стекна во минатата година.

Фолксваген има шест модели во Топ 50 во септември, еден помалку отколку во август.

Шкода исто така има шест модели во Топ 50, со Октавија како најпродаван модел на чешката марка, на 16-то место.

Топ 50 Најпродавани модели на европскиот пазар во септември 2024