Фабриката на Мерцедес-Бенц во Раштат, град меѓу Карлсруе и Баден Баден, денес одбележа важен историски момент. Шестмилионитиот автомобил под знакот на сребрената ѕвезда излезе од фабриката. И симболиката одговара, славеничкото возило е електричен ЕКуА.
Мерцедес во фабриката во Раштат ги произведува своите модели од компакт класата. Во минатата година, продукцијата на сите варијанти во моделското семејство на А-Класа достигна околу 210.000 возила.
Тоа што автомобилот за големиот јубилеј е електричен, се совпаѓа со најавата што по овој повод ја даде Јерг Бурцер, член на управниот одбор со одговорност за производството: „Со производството на ЦЛА како прв модел врз платформата ММА од средината на деценијата, го нагласуваме насочувањето на фабриката во Раштат кон ‘само електрично’ и нејзиното значење во светската мрежа на Мерцедес-Бенц.“
Автомобилот што го спомнува Бурцер веќе се има појавено пред јавноста и притоа предизвика сензација. Тоа е Концепт ЦЛА Класа, прикажан во септември на салонот ИАА Мобилност во Минхен.
Мерцедес-Бенц почна да произведува во фабриката во Раштат во 1992 година. Во моментов оттаму излегуваат пет модели: Лимузинската и комбилимузинската изведба на А-Класа, ванот Б-Класа, ГЛА и целосно електричниот ЕКуА.
Inside Rastatt: Join us for an exclusive glimpse into the high-tech production of our compact cars. From the all-electric EQA to A-Class, B-Class, and GLA models, the Mercedes-Benz Rastatt plant is driving innovation. #MercedesBenz pic.twitter.com/oq7QhYDSmu
— Mercedes-Benz (@MercedesBenz) October 18, 2023
Од средината на деценијата, во Раштат ќе почне производство на модели врз новата платформа ММА. Станува збор за најмладата фабрика на Мерцедес-Бенц во Германија.
Раштат вработува 6.100 лица и располага со површина од 1,5 милиони метри квадратни. Со тоа, фабриката се вбројува меѓу најголемите и најважни работодавци во регионот, покривајќи ги Карлсруе, долината Мург и Алзас.
