Натпреварувачите во рели-серијата со Defender треба само да пристигнат на местото на трката, каде што ги чека подготвено возило – откако ќе платат 150.000 фунти за возилата што специјалистот Bowler ги има подготвено со врвна експертиза.
JLR и специјалистите за подготовка на возила за теренски трки најавија дека шеснаесет тимови ќе се натпреваруваат во третата сезона на рели-купот со Defender 90. Во тркачкиот календар за сезоната 2024 се предвидени седум трки во Шкотска, Англија и Велс. Спецификацијата на возилото што е посебно подготвено од Bowler Motors сега ги исполнува и нормите за трки на меѓународно ниво, така што на учесниците во новата сезона им е оставено да решат дали ќе возат и трки надвор од купот.
За транспортот на возилата до трката, за одржувањето и сервисирањето, се грижи Bowler, така што на учесниците буквално им останува само да се појават на местото и да се сместат зад воланот.
Во погонската спрега нема дополнителни зафати. Единствено е интервенирано во системот за ладење на моторот и исто така е подобрено ладењето на менувачот. Спортски издув се подразбира. Како основа служи Defender 90 P300 SE, со дволитарски турбо бензинец со 300 КС и вртежен момент од 400 Nm. Спринтот останува непроменет, на рели-теренецот му се потребни само 6,7 секунди до темпо сто.
Теренските способности на Defender и инженерингот со којшто располага JLR се неоспорни. Тоа што ја прави посебноста на оваа тркачка серија е целосната услуга од специјалистот Bowler, со искуство стекнато меѓу другото и на Рели Дакар.
Во целиот тек на првенството, Bowler се грижи за возилото, од чување и перење, до проверка, одржување и поправка – секако со соодветен трошок. На учесниците навистина им преостанува само да дојдат на местото на трката и да се сместат зад воланот. Тој принцип на седи и вози е најпривлечното во овие времиња во коишто секој час е важен.
Пример за неколку преправки на серискиот модел, коишто влијаат врз перформансите на трка:
- Подобрено ладење за услови на трка
- Зголемен капацитет на ладење на менувачот
- Спортски издув Bowler
- Тркала Bowler од 18 инчи, полесни и зајаканти
- BFGoodrich гуми за сите терени
- Посебни зафати во подвозјето со преправки на помошните рамки, сменети пружини и амортизери Fox по нарачка
- Преправка на предната горна водилка заради сменетата геометрија поради зголемената висина од подлогата
- Тркачки волан
- Висока позиција на вшмукување воздух
