Спојлери за три, боја за седум илјади евра, новиот Mercedes-AMG GT 4-Door

Суперспортското купе со 4 врати Mercedes‑AMG GT има промени во новото моделско годиште, во „поскромната“ верзија со шестцилиндарски мотори. Моделите 2024 се препознаваат по новиот преден браник, којшто е сличен со оној кај најскапите модели со 8-цилиндарски мотори. Стандард се електричен сончев покрив и безжично полнење телефон.

Веста од марката од Афалтербах – AMG е оттаму, Mercedes-Benz е од Штугарт – важи за моделите AMG GT 43 4Matic+ со 367 КС и AMG GT 53 4Matic+ со 435 КС. Двата модели располагаат и со стартер-генератор со моќност од 16 kW/22 КС, со потпомагачка функција при забрзување. Цената на стандардните изведби на германскиот пазар изнесува 110.735,45 евра за првиот и 127.692,95 евра за вториот модел.

Освежување доби и инфо-забавниот систем MBUX со фамозната „Еј, Мерцедес“ команда. Нова е графиката на системот, со симболи што се својствени за AMG, како и со можност за функциите да се нагодат по желба.

Доколку се доплати за скапиот, но планетарно најдобар аудио систем од Burmester (германски специјалист за аудио, домашните звучници BC350 тежат по 400 kg по парче и пар чинат 230.000 евра) или за уште понапредниот Burmester High‑End 3D‑Surround‑Soundsystem, следи и најнапредната постпродукција на звук Dolby Atmos, којашто овозможува сосем ново звучно доживување.

Во стандардната опрема спаѓаат уште менувач AMG SPEEDSHIFT TCT 9G, подвозје AMG RIDE CONTROL и тркала AMG од 19 инчи со десет краци. Во GT работи и полн арсенал од системи за асистенција, врвна климатизација THERMATIC и најнапредна диодна техника во светлата MULTIBEAM LED.

Моторот во двата случаи е линиски шестцилиндарец од три литри, со двојно турбонатполнење, со 367 или 435 КС.

 

View this post on Instagram

 

A post shared by Mercedes-AMG (@mercedesamg)

Афалтербах објави неколку ставки од дополнителната опрема:

• AMG V8 Styling-пакет за надворешност: 3.451,00 евра
• AMG Aerodynamik-пакет: 3.391,50 евра
• AMG Carbon-пакет за надворешност: 4.403,00 евра
• AMG Chrom-пакет за надворешност: 1.130,50 евра
• AMG Night-пакет за надворешност: 1.130,50 евра
• AMG Night-пакет II: 654,50 евра
• MANUFAKTUR selenitgrau magno: 7.021,00 евра
• Активно управувана задна оска: 2.023,00 евра
• Пакет за мултиконтурни седишта: 476,00 евра
• AMG Performance седишта: 2.320,50 евра
• Burmester® High-End 3D Surround Sound System: 5.926,20 евра
• AMG DYNAMIC PLUS пакет: 3.867,50 евра