Ferrari ќе користи дисплеи со органски светлечки диоди (OLED) од Samsung Display во своите идни модели.
Јужнокорејската компанија посебно за Ferrari ќе развие дисплеи со OLED технологија, што ќе се вградуваат во идните модели од Маранело, изјави извршниот директор на италијанската марка, Бенедето Виња.
Директорот претходно напомена дека во време кога Ferrari вложува во електрификација, компанијата ќе користи надворешни добавувачи за компонентите што не се клучни за возењето. Истото важи и за софтверот.
Ferrari планира својот прв целосно електричен автомобил да го претстави во 2025 година.
Samsung Display е единица на Samsung Electronics и вложува повеќе од 3 милијарди долари во производството на OLED дисплеи во Асан, Јужна Кореја.
На салонот за потрошувачка електроника ЦЕС во Лас Вегас, во јануари годинава, Samsung Display го прикажа својот нов дигитален кокпит, што се состои од тенок и заоблен дисплеј од 34 инчи.
