Toyota продаде 10,5 милиони возила во 2022 година, бранејќи го насловот на најголем производител на моторни возила во светот, трета година во низа.
Глобалната продажба на групацијата, во којашто влегуваат уште марката товарни возила Hino и специјалистот за мали автомобили Daihatsu, се намалила за 0,1 процент, односно за само еден промил во споредба со 2021 година. Рекордната продажба на извозните пазари од 8,6 милиони возила, надомести за падот во продажбата на домашниот пазар. Во Јапонија лани биле продадени 1,9 милион возила, или за 9,6 проценти помалку во споредба со преклани.
На второто место е групацијата Volkswagen, од каде што во почетокот на месецов пријавија најслаба продажба во изминатата деценија, со 8,3 милиони возила. Причините за тоа се прекините во производството во фабриките во Кина, поради пандемијата, како и прекинатите синџири за снабдување со компоненти, поради војната во Украина.
Toyota исто така се соочуваше со проблеми во снабдувањето со микрочипови, но силната побарувачка во Азија и зголемувањето на производствените капацитети и оптимизацијата во Азија и Северна Америка, придонесоа глобалната продукција да се зголеми за 5 проценти во 2022 година.
View this post on Instagram
Јапонската корпорација во ноември ги објави плановите за тековната финансиска година, којашто завршува на крајот на март, и во којашто се предвидува продукција од 9,2 милиони возила, место 9,7 милиони претходно.