за

Камион Kenworth без проблеми на Пајкс Пик – со водороден погон од Toyota

Искачувањето до врвот на Пајкс Пик во Колорадо е предизвик. Затоа таму и се вози една од најпредизвикувачките трки во светот. Еден необичен „тркач“ го прифати предизвикот.

Со стрмни нагорнини и повеќе од 150 свијоци, освојувањето на врвот на 4.300 метри надморска висина е предизвик за секој автомобил. За камион од тешка категорија, уште повеќе. Еден типичен американски камион Kenworth се искачи до врвот без проблеми, па дури и без грам штетни материи. Toyota вгради водороден погон во камионот.

Kenworth, американскиот специјалист за камиони од најтешка категорија, испиша уште едно историско поглавје. Примерок што однадвор личи како класичен Kenworth T680 со дизел мотор, се искачи на врвот на Пајкс Пик без ниту грам штетна емисија. Камионот користеше водороден погон, каков што Toyota веќе долго вградува во своите сериски автомобили.

Најголемиот дел од преработката го заврши инженерскиот тим на Toyota во развојниот и истражувачки центар во Гардена, Калифорнија. Од тимот воедно и потекна идејата за дизел моторот да се замени со водороден погон, каков што се вградува во Mirai, но приспособен за сосем различните услови во камион од најтешка категорија.

Тестирањето на прототипите во Гардена започна уште во 2017 година, со постојано унапредување на конструкцијата и воведување иновации во секој следен прототип. Од Kenworth коментираат за успехот: „Патот до врвот на Пајкс Пик е долг и под постојана нагорнина, така што посебно нé радува што Kenworth T680 со погон од Toyota ги исполни нашите очекувања и се искачи до врвот, постигнувајќи одлични перформанси и одлично однесување во возењето.“

За американскиот производител на камиони, ова претставува уште еден пример за способноста на водородниот погон на Toyota. Целта на оваа соработка секако е Kenworth да понуди камион со водороден погон на Toyota во редовна продажба.

Последниот прототип два дена се тестираше по патот до врвот на Пајкс Пик. Од возењата се добија вредни податоци и заклулчоци, кои ќе се користат за усовршување на техниката, во поглед на издржливоста и ефикасноста. По сите тестирања до врвот, резервоарите за водород уште биле релативно полни.

>>> Шоферска служба минала 5.000.000 km со водородни Toyota Mirai

Дарко Јаконов

Напишано од Дарко Јаконов

Објавува текстови за автомобилизам од 1994 година, дел од оригиналната постава на магазинот Ауто Плус на Томислав Биљарац, главен уредник на првото лиценцирано издание на Ауто Билд Македонија, член на жирито за избор на европски автомобил на годината Ауто 1 на групацијата магазини Ауто Билд, во 2013 година ја основа Аутомедиа.

Напишете коментар

Avatar

Вашата адреса за е-пошта нема да биде објавена. Задолжителните полиња се означени со *

Големите снегови не го попречија производството во Volkswagen

Toyota 20 години го произведува Yaris во Франција