Фабриките на Тојота ширум светот произведоа помалку возила во јуни, што е петти месец во низа, најголемиот производител на автомобили во светот да трпи последици од скандалот околу хомологациите на домашниот пазар и од беспоштедната ценовна борба во Кина.
Производството во јуни се намали за 13 проценти, на 795.862 возила. Тоа е најголем пад по декември 2022, објави Тојота во соопштението од 30-ти јули.
На домашниот пазар, производството забележа пад од 19 проценти, откако министерството за транспорт утврди нелравилности во документацијата на Тојота и на останати производители, во којашто беше лажно прикажано дека возилата ги исполнуваат барањата за хомологација.
Во Кина, во време кога домашните производители на електрични возила постигнуваат огромен раст и го зголемуваат пазарниот удел, главно со агресивни попусти, производството опадна за 22 проценти. Тоа е петти месец Тојота да бележи пад во продажбата за 20 проценти и повеќе.
Производството во Северна Америка се намали за 6,2 проценти, додека Европа заостана за 6,6 проценти зад продукцијата во јуни лани, меѓу другото и поради тоа што фабриките имаа помалку денови за производство.
Вкупната продажба исто така опадна за 5,1 проценти во јуни, првенствено поради слабеењето на пазарите во Јапонија и Кина.
Јапонскиот производител ќе ги објави финансиските резултати за првото тромесечје на 1-ви август. Се очекува дека профитот ќе биде зголемен за 21 проценти во споредба со лани и ќе изнесува околу осум милијарди евра. Така цени консензусот од шест аналитичари, кои ги земаат предвид ослабнатиот јен и силната побарувачка за хибридни модели во САД.
Во првите шест месеци, светската продукција на Тојота опадна за 5 проценти, додека вкупната продажба е 0,9 процент во пад.
Продажбата и продукцијата ги вклучуваат и податоците за луксузната марка Лексус.
