Екстремите на Toyota GR Yaris: Карбон, алу и 4.175 варови

Toyota GR Yaris е меѓу најекстремно изведените автомобили во класата, па и во една класа погоре. Покривот е изработен од карбон, вратите и поклопците се од алуминиум, каросеријата е за 95 милиметри пониска од обичниот Yaris, а за постигнување исклучителна крутост, по целата каросерија се изведени 4.175 варови.

Малечок автомобил на голема мисија. Тркачкото чувство во возењето на Toyota GR Yaris не е туѓо, туку му е вродено. Тој служи како основа за хомолација за рели-болидот на Toyota Gazoo Racing. Екстремниот тркач е конструиран во соработка со тимот за рели на Toyota и вклучува богато искуиство и знаење од експертите за мотоспорт. При развојот на моделот беше ставен посебен нагласок на лесната конструкција на каросеријата и на крутоста на истата, што ќе издржи и најекстремни напрегања од рели патеките.

Уште едно врвно достигнување на инженерите на Toyota е тоа што погонот на сите тркала GR Four и моќниот 1,6-литарец со 261 КС се вградени во каросерија што минимално е поголема отколку на стандардниот Yaris. Тоа што најмногу одушевува секако е тежината од 1.280 килограми. За тоа е заслужна вештата комбинација од материјали за каросеријата, во којашто влегуваат десетина проценти алуминиум.

Платформата на Toyota GR Yaris е единствена. Предниот дел потекнува од новиот стандарден Yaris (GA-B платгформа), додека задниот дел доаѓа од Corolla & Co (GA-C). Единственото што е заедничко во надворешноста меѓу Yaris и GR Yaris се предните и задните светла, ретровизорите и кровната антена.

Карбонскиот покрив не е изработен вообичаено со „плетење“, туку е пресуван. Ова е прв модел на Toyota со карбонски покрив. Во споредба со челичен покрив, тежината е смалена за 3,5 килограми. Поважно е тоа што покривот е највисоката точка и заштедата таму придонесува најмногу за тежиштето на целото возило да се спушти. Тоа, пак, во голема мера решава за управливоста. Задниот дел од покривот е спуштен за 95 милиметри, за воздушната струја да се води полесно до задниот спојлер. Оваа силуета е изведена имајќи го предвид „рели-јарисот“, со масивен заден спојлер.

Toyota GR Yaris во голем дел е идентичен со рели-болидот за WRC, затоа што правилата дозволуваат само малку промени од серискиот модел

Уште една клучна разлика со цивилниот Yaris секако е во бројот на врати. GR (од Gazoo Racing) е развиен само во варијанта со три врати. Според правилата на WRC, не смее да се менуваат вратите на тркачките болиди. Затоа вратите на уличната изведба се изработени од алуминиум и немаат рамка. Лесниот метал се користи и за хаубата и задниот поклопец.

Уште еден трик на конструкторите за намалување на тежината е примена на тенка челична ламарина со исклучителна цврстина. Во скусувањето на секаков вишок килограми учествува и задниот спојлер од т.н. Toyota Super Olefin Polymer (TSOP), кој е потенок и полесен е за 38 проценти.

Покрај ниската тежина, кај тркачките рели-болиди е важна и крутоста на каросериајта. GR Yaris во таа насока поседува 4.175 завари (заварени точки) или 259 повеќе од стандардниот Yaris. Крутоста е дополнително зголемена со примена на структурни лепила меѓу конструкциските делови на каросеријата. Вкупно 35,4 метри од каросериските споеви се изведени со лепило. Тоа е за 14,6 метри повеќе отколку кај стандардниот Yaris.

Опција е пакет за високи перформанси, кој вклучува ковани тркала од 18 инчи со 10 краци, кои исто така придонесуваат за смалување на тежината. Во пакетот понатаму влегуваат блокада на предниот и задниот диференцијал, заради натамошно зголемување на возната динамика.

Технички податоци · Toyota GR Yaris