за

Утка во нов софтвер скусила досег на Tesla, за враќање 4.500 евра трошок

Грешка на Tesla при конфигурирањето на возилото на еден клиент го скусила досегот на електричниот автомобил за 129 километри. За досегот да се врати, биле побарани 4.500 долари.

tesla priemno oddelenie

Случајот со овој сопственик на Tesla е сличен со хакерските напади, кога податоците на компјутерот се заклучени и за отклучување треба на уценувачот да му се плати одредена сума. За досегот на електричниот автомобил да се врати како пред обновувањето на софтверот, сопственикот треба да плати скапо.

Автомобилот за којшто станува збор, произведен е во 2013 година, моделот е S 60, и сегашниот сопственик го купил како користен автомобил. Поради дефект на батеријата, таа пред неколку години била заменета со нова, во рамки на гаранцијата. Бидејќи сервисот на Tesla во моментот не располагал со батерија од 60 kWh, била вградена поголема батерија од Tesla Model S 90. На тој начин, сопственикот на Tesla Model S 60 по сервисирањето практично добил Tesla Model S 90, вклучувајќи и подолг досег.

По девет години откако автомобилот излегол од фабрика, од Tesla му се јавиле на третиот и актуелен сопственик. Човекот дознал дека производителот при обновувањето на софтверот открил грешка во конфигурацијата на возилото и му било понудено да се отстрани тој пропуст. Не е тешко да се погоди, каде погрешиле во Tesla. При вчитувањето на новиот софтвер, било земено предвид дека станува збор за Tesla Model S 60. Соодветно на тоа, се скусил и досегот, па место софтверот да се ориентира според заменатата батерија од 90 kWh, тој сметал дека батеријата е старата, значи од 60 kWh. На тој начин, досегот се скусил за 129 километри.

Кога сопственикот побарал Tesla да излезе со решение за проблемот, оттаму му соопштиле дека тоа е можно, но ќе треба да плати 4.500 долари за сервисниот зафат. Нормално дека во таков случај се бара друг излез. Помош била побарана во независната сервисна работилница за Tesla, на прочуениот експерт Џејсон Хјуз. Тој е еден од првите што ја има целосно расклопено батеријата на Model S и јавно ги има прикажано конструкцијата и техниката. Експертот преку меморијата видел каква историја ѝ се има случено на Tesla Model S и успеал да го врати првичниот досег. Но, „поправката“ траела само кусо, затоа што автоматизираниот софтвер на Tesla, т.н. Teleforce-Bot, веднаш ги бришел зафатите на Хјуз.

Постојат начини да се надмудри софтверот на Tesla, но ниту еден од нив не е оптимален. Единствено Tesla може да го реши проблемот. Така и се случи. Откако Хјуз објави на твитер за случајот, се раздвижија нештата во Tesla, па експертот подоцна објави дека во сличен случај со друг клиент, производителот ја отстранил блокадата. Дали за тоа исто така бил побаран откуп, или случајот бил решен бесплатно, засега е непознато. Во меѓувреме и сопственикот на Tesla од којшто почна целата приказна, повторно го има на располагање целосниот досег на батеријата што е вградена во неговиот автомобил.

Напишано од Дарко Јаконов

Објавува текстови за автомобилизам од 1994 година, дел од оригиналната постава на магазинот Ауто Плус на Томислав Биљарац, главен уредник на првото лиценцирано издание на Ауто Билд Македонија, член на жирито за избор на европски автомобил на годината Ауто 1 на групацијата магазини Ауто Билд, во 2013 година ја основа Аутомедиа.

Напишете коментар

Вашата адреса за е-пошта нема да биде објавена.

Land Rover Defender со мотор 5.0 V8 во серија од 25 примероци

Британската пошта купи уште 2.000 електрични фургони Peugeot