Дарко Јаконов
Брзите полначи на Tesla, познати како „суперчарџери“, во иднина ќе бидат достапни и за електричните возила од други марки.
Информацијата ја објавија неколку специјализирани вебсајтови, повикувајќи се на протоколот од седница на советот на извесна општина Вестланд во Норвешка. Американскиот производител се сложил да ја отвори својата мрежа од станици за полнење до септември следната година. Причина за одлуката е државната субвенција за изградба на станици со полначи, којашто следува единствено доколку станиците се достапни за сите електрични автомобили. Уште е неизвесно дали одредбата за Норвешка ќе важи и за суперчарџерите во останатите држави.
Подолго време кружат гласини и барања околу „отворањето“ на полначите. Шефот Илон Маск уште лани најави дека суперчарџерите може да се отворат и за останатите производители, доколку тие учествуваат финансиски во изградба на истите. Тогаш немаше конкретни бројки, ниту датум. Во Германија исто така се водат преговори за полначите да станат достапни за сите.
Недоволната инфраструктура од брзи електрични полначи важи како една од главните пречки за уште поголем пробив на електромобилноста. Мрежата од суперчарџери на Tesla е далеку најголема мрежа во сопственост на еден проиводител. Мрежата опфаќа 25.000 брзи полначи на 2.700 локации.
