за

Suzuki Vitara добива полн хибриден погон со 115 КС

Suzuki одамна го најавува полниот хибриден погон во Vitara. Kој очекуваше 100% пресаден погон од Toyota, сега ќе се увери дека Suzuki секогаш е за оригиналност.

Полн хибриден погон доаѓа во Suzuki Vitara. Начинот на работа го познаваме од нејзиниот партнер и пионер на хибридниот погон Toyota, но очигледно е дека главнината од погонската техника потекнува од Suzuki.

Јапонскиот специјалист за терен и за градски автомобили Suzuki беше меѓу првите производители што целосно го исклучи дизелот од своите автомобили, а меѓу првите почна и со примената на благ хибриден погон. На тоа следеше и широкоградо вградување на системи за асистенција, од типот на радарски темпомат или систем за задржување во лента. Suzuki сега преоѓа во следниот стадиум.

Компактниот СУВ-модел Suzuki Vitara од првото тромесечје во 2022 година ќе се нуди и во изведба со полн хибриден погон. Моторот е 1,5-литарски четирицилиндарец, без турбонатполнење. Може да се избира меѓу изведба со преден или со приспособлив погон на сите тркала ALLGRIP SELECT, што е познат од постоечките модели.

Срцето на полниот хибриден погон го сочинува електромотор со моќност од 24 киловати, односно 37 КС. Тој му асистира на 1,5-литарскиот DualJet-бензинец со 102 КС (засега е само претпоставка дека тоа е моторот К15B од Jimny, Vitara Breeza и др), при забрзување и поаѓање, но електромоторот може и самостојно да ја движи Vitara. Системската моќност изнесува 115 КС. Погонот го заокружува автоматизиран 6-степен мануелен менувач. Батеријата е литиум-јон.

Тоа е големо освежување на моделот што постигна одличен успех на поширокиот европски пазар, а секако и во Македонија. Во редакцијата уште немаме информации за датумот на отпочнување со продажба на новата погонска изведба во понудата на Vitara, но е мошне извесно дека таа ќе се нуди на македонскиот пазар. 

Покрај изведбата со полн хибриден погон, Suzuki ќе продолжи да го нуди моделот со благ хибриден погон, со 1,4-литарски турбо-бензинец со 129 КС, кој работи во комбинација со 48-волтен стартер генератор и со мануечлен менувач.

Според фабрика, просечната потрошувачка на гориво на Suzuki Vitara 1.5 DUALJET HYBRID AGS се движи меѓу 5,8 и 5,3 l/100 km (норма WLTP), додека вредностите кај Suzuki Vitara 1.4 BOOSTERJET HYBRID MT се движат меѓу 5,9 и 5,4 l/100 km.

Напишано од Дарко Јаконов

Објавува текстови за автомобилизам од 1994 година, дел од оригиналната постава на магазинот Ауто Плус на Томислав Биљарац, главен уредник на првото лиценцирано издание на Ауто Билд Македонија, член на жирито за избор на европски автомобил на годината Ауто 1 на групацијата магазини Ауто Билд, во 2013 година ја основа Аутомедиа.

Напишете коментар

Вашата адреса за е-пошта нема да биде објавена.

Volvo културно одбележа 50 години на марката во Русија

Alpine A110 за француската полиција