Именуван по латинскиот збор за нешто што се осветлува од ѕвездите, концернот Stellantis потпиша преддоговор со владата на Јужна Африка, за својата прва фабрика во земјата, чијашто изградба треба да заврши до крајот на 2025 година.
Договорот предвидува новата фабрика да се гради во една од слободните економски зони во Јужна Африка. Во денешното соопштение од концернот, главниот оперативен директор на Stellantis за Средниот Исток и Африка, Самир Черфан, наведува понатаму дека „производствената фабрика во Јужна Африка ќе биде нов градежен блок во нашата стратегија за индустријализација, којашто вклучува план да продаваме еден милион возила во регионот до 2030 година, со 70 проценти од самостојно регионално производство и којашто ќе нé доближи до потребите на нашите клиенти во регионот“.
Stellantis во моментов располага со девет фабрики во регионот МЕА (Средниот Исток и Африка), во којшто се опфатени 80 држави, вклучувајќи ги Турција и Пакистан.
Во новата фабрика се очекува да се произведуваат возила и за локалниот пазар и за извоз.
Stellantis во почетокот на месецов го објави договорот со турскиот партнер Koc Holding, со којшто се планира натамошно проширување на нивната заедничка компанија Tofas.
Концернот Stellantis го сочинуваат автомобилските марки и услужните компании:
- Abarth
- Alfa Romeo
- Chrysler
- Citroën
- Dodge
- DS Automobiles
- Fiat
- Jeep
- Lancia
- Maserati
- Opel
- Peugeot
- Ram
- Vauxhall
- Free2move и
- Leasys
